Accessibility links

шимбә, 3 декабрь 2016, Казан вакыты 07:46

Pedagogiä Universitetında yaña rektor saylandı


Saylaw aldı kompaniäse qatlawlı şartlarda ütte häm 2 ayğa suzıldı. Xäzer inde tulı ışanıç belän äytep bula, kiläse 5 yılda şuşı universitet belän Cämil Gäziz ulı Niğmätov citäkçelek itäçäk. Saylawlarda qatnaşqan 200 keşeneñ 173 anıñ öçen tawış birğän.

Cämil Niğmätov atqazanğan fän eşleklese, pedagogiä fännäre doktorı, professor. Elekke rektor Rüzäl Yosıpov eştän azat itelgän arada ul, rektor wazifaların başqarıp tordı. Bügen, Azatlıq tıñlawçıların yaña rektor belän yaqınnanarak tanıştırırğa buldıq:

Audio: Cämil Niğmätovnıñ saylaw aldı programmasında uqıtu sistemasına üzgäreşlär kertü häm ğalimnärneñ, studentlarnıñ matdi xälen yaqşırtunı wäğdä itelğän ide. Uqıtudağı üzäreşlärne ul, bakalavr, magistr däräcälären kertüdä kürä. Yäğni 8 yıllıq mäktäptä 4 yıllıq bakalavr diplomı belän dä uqıtıp bula dip isäpli ul. Ä 5 yıl däwamında belem alğan student magistr-belgeç diplomı belän çığıp kitä, häm törle däräcädäge mäktäplärdä eşli ala, dip äytte Cämil äfände. Rektor şulay uk internet aşa uqıtunı – distansion sistemanı kertüne dä küzdä tota. Läkin şunduq, iskärtep tä quya, bu ber könlek eş tügel. Anıñ öçen küp tırışırğa häm universitetnıñ, mäktäplärneñ texnik mömkinlegen üsterü kiräk di. Yaña rektor, yaña binalarnı tözü turında da xıyallana. Studentlar öçen universitettan yıraq tügel ber urında 600-700 keşelek tulay toraq tözetergä ide di ul. Monısı xıyal ğına bulsa, yaqın arada universitetnıñ geografia häm biologiä fakultetı öçen yaña bina tözeleşen başlaw inde planğa kerğän ikän.

Cämil Niğmätovnı universitet wäkilläre rektor itep saylasa da, anı rektor itep bilgeläw turında Rusiä mäğärif ministrı äle qarar çığarmağan. Bu qarar yaña saylanğan rektor Rusiä mäğärif ministrlılığınıñ kollegiäsendä raslanğaç qına çığarılaçaq ikän. Bu mart urtasında bulır dip kötelä.

XS
SM
MD
LG