Accessibility links

җомга, 9 декабрь 2016, Казан вакыты 16:30

Britaniä Rusiäneñ, Ğiraqtağı inspektorlarğa basım yasala digän ğäyepläwen kire qağa


Ğiraq säyäsäte häm andağı xalıqara inspektorlar eşe tiräsendäge bäxäslärgä üz öleşen Rusiä dä kertergä buldı. Tışqı eşlär ministrı İgor İvanov, Berläşkän Millätlärneñ Ğiraqtağı inspektorlarına basım yasala, alardan suğış başlaw öçen berär sıltaw tabunı taläp itälär dip çıqtı. Britaniäneñ BMO-dağı daimi wäkile isä Mäskäwneñ şuşı ğäyepläwlären kire qaqtı, qoral inspektorları üz eşen tulısınça irekle räweştä alıp bara dip belderde.

Älegä qädär kisken belderülärdän totılıp torğan Rusiä atnakiç Ğiraq tiräsendäge xällär uñayınnan şaqtıy qırıs süzlär belän çıqtı. İlneñ tışqı eşlär ministrı İgor İvanov, Ğiraqtağı qoral inspektorlarına, alarnıñ annan kitüwenä ireşü yä suğış başlaw öçen alarnıñ nindi dä bulsa berär dälil tabuwı maqsatında qatı basım yasala dip belderde.

Audio

Üzeneñ şuşı belderüwendä Rusiä tışqı eşlär ministrı, Berläşkän Millätlärneñ Ğiraqtağı inspektorlarına basım yasawda şiklänelgän ayırım illärne telgä almadı. Elekke küzätülär Ğiraqta 1998-nçe yılda, amerikan häm britannarnıñ hawa höcümnäre aldınnan tögällängän ide, döresräge räsmi Bagdad alar belän xezmättäşlek itüdän baş tarttı häm inspektorlar asılda ildän quwıp çığarıldı. İvanov süzlärenä qarağanda, inspektorlarğa basım yasaw mäs’äläsen Mäskäw İminlek Şurası utırışında da kütärergä teli, çönki alarnıñ Ğiraqtağı küzätülärdän nindi mäğlümat birüwenä Şuranıñ yaqın könnärdä Bagdadqa qarata nindi säyäsät alıp baruwı bilgelänäçäk. Rusiä ministrı, Ğiraq mäs’äläsendä beryaqtan Fransiä, Rusiä häm Qıtay, ä ikençe yaqtan Amerika Quşma Ştatları häm Britaniä arasında barğan diplomatik köräştä yaña säxifäne, inspektorlar öçen tartqalaşu çorın açıp cibärde kebek. Anıñ belderüwenä cawap Britaniäneñ Berläşkän Millätlärdäge daimi wäkile Jeremy Greenstocktan kilde. Şul uq könne ul İvanov süzlären kire qağıp, inspektorlar üz eşen barı tik töp citäkçeläre Hans Blix qulı astında ğına alıp bara, ä ul isä üz hönären yaxşı belgän bäysez şäxes bularaq bilgele dip belderde.

Audio

Ägär dä sez alarnıñ urında alıp barğan eşenä qarasağız, alar Hans Blix häm Möxämmäd äl-Baradei quşqannı eşlilär, ä alar isä qararlarnı möstäqil qabul itä, çittän bernindi dä basım buluwın kürmim dip belderä İminlek Şurasındağı britan wäkile. Blixnıñ matbuğat wäkile Ewen Buchanan da, inspektorlar citäkçeseneñ Ğiraqtağı eşe mäs’äläsendä berniçä däwlät belän elemtädä toruwın, läkin berkemnän dä kürsätmälär almawın äytä.

Audio

Blix kiñäşlärne küp illärdän ala, läkin qoral inspeksiäläre yünäleşen bilgeläw tulısınça añardan ğına tora. Misal öçen bu atnada ğına ul britan wäkile Greenstock, amerikan wäkile Negroponte, germannar, fransuzlar, urıslar belän oçraştı, häm bu äle başlanğıç qına di Hans Blixnıñ matbuğat wäkile Buchanan. Berläşkän Millätlärneñ Ğiraqtağı qoral inspektorları citäkçese elek tä üzeneñ ayırım däwlätlärneñ teläklären ütäw belän şöğellänmäwen belderep kilgän ide.

Kärim Kamal, Praga.
XS
SM
MD
LG