Accessibility links

пәнҗешәмбе, 8 декабрь 2016, Казан вакыты 17:13

Prezident yullaması – üzgäreşlär bulır kebek


Bu atnanıñ iñ möhim säyäsi çaralarınıñ berse – pänceşämbedä uzğan Däwlät Şurasınıñ çirattağı plenar sessiäse buldı. “Azatlıq” radiosınnan berençe xäbärlär yañğıradı inde. Şulay da, parlament utırışında iğtibarğa layıq berniçä waqiğa turında äytep kitmi bulmıy.

Älbättä, iñ zur qızıqsınu uyatqanı, Tatarstan Prezidentınıñ Däwlät Şurasına yıllıq yullaması ide. Nigezdä ul başqa yıllarnıqınnan ayırılmasa da, sizger elita öçen bu yulı şärexläwlär wä nüanslar citärlek buldı. Ğädättä, Ministrlar Kabinetına tel-teş tidermägän Prezident oşbu tapqır xökümätne tänqitläp ütte. Mintimer Şäymiev fikerençä, Ministrlar Kabinetı qabul itkän strategik qararlar cirenä citkerelep äzerlänmi häm xoquqi yaqtan tulısınça nigezlänep betmi. Küräseñ, Prezidentnı iqtisatta üseş templarınıñ kimüe nıq borçıy. İqtisat ministrlığına atap äytelgän tänqit süzläre änä şul xaqta söyli. Dimäk, yaqın arada xakimiät dairälärendä selkeşü-selkenü xällären kürergä mömkin bulaçaq.

Şul yünäleştä fikerläp, Mintimer Şäymiev tänqit itkän räsmi ike gäcitneñ häm “Mädäni comğa” basmasınıñ yazmışında da üzgäreşlär ozaq köttermäs diärgä bula. Mintimer Şäymievnıñ çığışında tänqitneñ qatısı da, yomşağı da, “qızım siña äytäm, kilen sin tıñla”, dip kinayäläp äytkäne dä citärlek ide.

Sizen cöplär aldınnan respublika citäkçese isemnären äytmiçä genä 2005 yılda uzaçaq Prezident saylawlarına ömet totuçı däğwäçılarğa barmaq yanadı: yänäse, aşıqmağız, yul ozın, täkenep yığıluığız bar. Babaynıñ bu iskärtüen säyäsi elita niçek añlağandır, monısın älegä äytüe qıyın. Ä menä Prezidentnıñ oşbu çeterekle mäsäläne üze öçen dä axırğa xätle açıqlamawı sizelä. Yäğni, yegetlär aşıqmağız, yä aşqa peşärsez, waqıtı citkäç, min üzem tabarmın, tapmasam tağın ber srokka qalırmın.

XS
SM
MD
LG