Accessibility links

чәршәмбе, 7 декабрь 2016, Казан вакыты 21:24

Amerikan häm britannarnıñ Ğiraq turındağı yaña qararı bügen bäyän iteläçäk


Brüssel. Britan tışqı eşlär ministrı Jack Straw süzlärenä qarağanda, London häm Waşington Berläşkän Millätlär Oyışmasınıñ Ğiraqqa qarşı köç qullanunı röxsät itkän yaña qararın ike atna eçendä qabul itelüwen teli. Straw bu xaqta düşämbedä Brüsseldä belderde. "Xalıqara däräcädä kileşüne häm xezmättäşlekne, Ğiraqnıñ tulısınça xezmättäşlek itüwen teläwebez säbäple bez İminlek Şurasınnan qarar qabul itüne ütenü aldınnan ike atna, bälki beraz ozağraq ta kötärgä äzer" di britan tışqı eşlär ministrı. Amerikannar häm britannar äzerlägän yaña qarar ölgese İminlek Şurasına bügen soñraq täqdim iteläçäk. Monı Waşingtonda Aq yortnıñ matbuğat wäkile Ari Fleischer da rasladı. Ul şulay uq, Ğiraq qoralsızlanu yöklämälären bozdı dip belderde. Germaniä kanslerı Gerhard Schroeder isä düşämbe irtän Fransiä prezidentı belän oçraşır aldınnan, Parisnıñ da, Berlinneñ dä yaña qarar kiräklegen kürmäwen belderde. Fransiä häm Germaniä Ğiraqtağı qoral inspeksiälären nığıtunı alğa sörä. Ul arada Ğiraq prezidentı Saddam Xösäyen, maxsus säfär belän Bagdadqa kilgän Yevgeni Primakovqa, üz ileneñ qoral inspektorları belän tulısınça xezmättäşlegen wäğdä itte dip xäbär itelä.

XS
SM
MD
LG