Accessibility links

Кайнар хәбәр

23 fevral' – nindi armiä köne?


Ağay-ene, üzegez beläsez, 24 fevral', düşämbe kön tağın yal itelä. Bu yulı 23 fevral' yäkşämbe kön bulu säbäple. Yäğni, ägär dä 23 fevral' eş könenä turı kilgän bulsa, barıber eşlämäs idek. Çönki 23 fevral' – kalendar'neñ qızıl köne. Zur bäyräm. Sovet armiäse köne belän xatın-qızlar irlärne ixlas küñeldän täbrik itü niçämä distä yıllar buyı ğädätkä kergän. İnde Sovetlar Soyuzı taralğaç, Sovet armiäse dä yuqqa çıqqaç, barıber tege matur ğädät onıtılmıy. İr-yegetlärne zurlaw, maqtaw, täbrik itü 8 Martqa, xatın-qızlar könenä qädär däwam itä. Qayberäwlär xäzer 23 fevral' belän irlärne täbrik itü – 8 Martqa investitsiä kertü, yäğni xatınnarnı zurlawğa äzerlek dip tä yörtälär. Xäzer 23 fevral' Watannı saqlawçılar köne. Bu bäyrämne Rusiä, Qazaxstan, Ukraina, Belorussiä citäkçeläre bergäläşep söyenä-söyenä «отмечать» ittelär. Nu sağınğannar üzläre. Ber urtaq iqtisadi berlek tözü turında plannar qora başladılar. Alay sağınası bulğaç, nigä ayırılğannardır. İkençe dönya suğışında bergäläşep, ber yaqta, ber frontta köräşkän xalıq xäzer inde törle ildä. Xätta, törle xärbi bloklarğa kergännäre bar. Äytik, Baltıyq illäre NATO berlegendä, Urta Aziä häm Belorussiä, Ukrainalar – Räsäy tiräsendä. Xäzer inde bu xalıqlarnı ütkännärne sağınu berläşterä. 1918 yılnıñ 23 fevralendä yaña tözelep kilgän Qızıl Armiä otryadları Narva tiräsendä mototsikllarğa utırıp yörgän nemes ğäskärlärennän qurqıp, qoralların taşlap qaçqan bulğannar. Xätta, Lenin üze «Правда» gazetında 25 fevral'dä bu xurlıqlı xäl turında açulanıp mäqälä bastırğan. Ä yaña tözelgän Sovet Rusiäseneñ Qızıl Armiäsen buldıru turındağı dekretqa Lenin 28 ğinwarda qul quyğan. Däwlät Duması deputatı Sergey Yuşenkov bıyıl Dumağa “Şuşı bäyrämne 23 fevral'dä tügel, ğinwar ayında uq ütkärik, adäm xurı bulmıyq”, dip täqdim kertte. Läkin barıber 23-dä bäyräm itäbez. Ğädättän dä köçle närsä yuq.

Äytergä kiräk, Tatarstan häm tatarlar, başqortlar Qızıl Armiägä häm Sovet Armiäsenä bik küp köç saldı. Millionlağan soldatlar, suğışçılar anıñ saflarında buldı. Distälägän, yözlägän generallar, meñlägän polkovniklar şul armiädä xezmät itte. Äle dä şuşı xärbilär könen millättäşlärebez ğorurlanıp bilgeli. Qazanda Watannı saqlawçılar könenä bağışlanğan tantanalı kiçä zurlap, räweşen kiterep ütkärelde.
XS
SM
MD
LG