Accessibility links

якшәмбе, 4 декабрь 2016, Казан вакыты 13:25

Bäyräm şawqımında kümelep qalğan Qazan faciğäläre


Şulay şul, bäyrämnän bäyrämgä xätle yäşäp künegelgän. İnde 8 mart xatın-qızlar bäyrämenä dä öç kön – 8-10 martlarda yal birelä, dip iğlan birelde. Ğäcäp tügel, bäyrämnär şawqımında qayber waqiğalar, faciğälär kümelep tä qala. 21 fevral' könne Qazanda militsiä polkovnigı Dawıt Korigov atıp üterelde. Cinayätneñ başqarılu räweşe monıñ zakazlı, yallap ütertü ikänen kürsätä. Respublika eçke eşlär ministrlığı ber versiä itep, polkovniknıñ üterelüe anıñ İnguşetiä eçke eşlär ministrlığında elek başqarğan wazifası belän bäyle bulırğa mömkin, dip iğlan itte. Sişämbe könne Tatarstannıñ eçke eşlär ministrı Äsğät Säfärov eş kiñäşmäsendä militsiä polkovnigı Dawıt Korigovnı üterüne faş itügä yärdäm itärlek mäğlümat birüçegä 100 meñ sum büläk wäğdä itte, dip yazdı www.İntertat.ru. Xäzer respublikada cinayätçelärne totu öçen maxsus operatsiä ütkärelä. Älege cinayät xaqında “Комсомольская правда”nıñ Tatarstan öçen maxsus çığarılışında qızıqlı faktlar kiterelä. Anda Dawıt Korigovnıñ xatını häm ike balası qaldı, korrespondentlarıbızğa şunısı da mäğlüm buldı, Korigovnıñ xatını Ayna xanım İnguşetiäneñ elekke prezidentı Ruslan Auşevnıñ tuğanı ikän, dip yazdılar.

“Комсомольская правда”, şulay uq, Qazandağı tağın ber waqiğa turında bäynä-bäynä täfsille xäbär birde. Qazannıñ üzägendä Stalin zamanında tözelgän biş qatlı yort işelü xälendä. Bu yortnıñ berençe qatında uzğan atnada ber fatirnıñ idäne işelep töşkän. Şunnan soñ yortta yäşäwçelär çığarılğan, yortnı qotqaruçılar komandası çolğap alğan. Qazanda älege işelergä torğan yort turında söylärgä yaratmıylar. Äle uzğan cäy Yerşov uramında işelgän yortta yäşäwçelärne dä tieşençä urnaştırıp, toraq belän tä'min itep beterä almıylar. Yerşov uramında yort cimerelgäç, Qazanda barlıq şundıy işelü qurqınıçı bulğan yortlarnı barlap çıqqannar. Alarnıñ sanı 270 ikän. Parij Kommunası uramındağı älege yort xäzerge waqıtta işelmägän, anıñ utı, suı, cılılığı yabılğan, keşelärgä waqıtlıça yäşäp toru öçen fatirlar täqdim itelgän.

XS
SM
MD
LG