Accessibility links

якшәмбе, 4 декабрь 2016, Казан вакыты 13:25

Ğiraq oppozitsiäse ilneñ kiläçäge mäs’äläsen tikşerä


Salahiddin, Ğiraq. İlneñ Saddam xökümätenä qarşı köräşkän ğıysyançılar qulındağı tönyağında Ğiraq oppozitsiäse törkemnäre bügen, Saddam Xösäyen xakimiattän çitläşterelgän oçraqta Ğiraq xökümäteneñ tözeleşe nindi bulu mäs’äläsen tikşerä. Kördstan Demokratik partiäse citäkçese Mäsüt Barzani bu uñaydan, demokratik wä federativ Ğiraq tözü maqsatı belän nihayät berdäm oppozitsiä qoru söyläşüläre başlanır digän ömet belderde. Anıñ fikerençä, ilneñ yaña qanuni nigezen buldıru öçen eşkä berläşterelgän oppozitsiäne cälep itärgä kiräk. Bügenge oçraşuda qatnaşqan qayber wäkillär Quşma Ştatlarnıñ Ğiraqta waqıtlı xärbi idarä urnaştıru niyätenä qarşı buluwın belderde. Qalğannarı Waşingtonnıñ, amerikan ğäskärlären törek cirendä urnaştıru röxsäte öçen Törkiägä çamadan tış zur taşlamalar yasawınnan qurqa. Mäğlüm ki, törek xökümäte kördlärneñ möstäqillegen arttıruğa qarşı çığa. Ğiraq oppozitsiäse köçläreneñ şuşı oçraşuwında qatnaşqan amerikan wäkile Zalmay Xälilzad bu qurqularnı taratırğa tırışa. Üz çığışında ul Waşingtonnıñ Ğiraqta idarä itü niyäte yuq, Ğiraq xalqı üz eşlären mömkin qädär tizräk üze xäl itärgä tieş dip belderde. Ğiraq Milli Kongressı räise Äxmät Çäläbi oçraşuda, bez Ğiraq cirendä Ğiraq xakimiaten telibez dide.

XS
SM
MD
LG