Fransiä tışqı eşlär ministrı Dominique de Villepin Ğiraq turında yaña rezolütsiä qabul itü zarur tügel, häm, ägär dä Berläşkän Millätlär oyışmasında bu mäs'älä tawışqa quyılsa, Fransiä qarşı bulaçaq dip belderde.
Ul Fransiäneñ veto xoquqın qulanaçaqmı, yäki tawış birüdän tıyılıp qalaçaqmı ikänen äytmäde. Russiä tışqı eşlär ministrı İgor İvanov Ğiraq krizisın tınıç yul belän çişügä ireşü öçen BMO İminlek Şurasınıñ 7 äğzası belän söyläşülär ütkärde. Quşma Ştatlar belän Britaniä BMO İminlek Şurasında Ğiraq turında ikençe rezolütsiä qabul itelüen teli. Rezolütsiä qabul itü öçen şuradağı 15 äğzanıñ 9-ı uñay tawış birergä, ber genä veto da bulmasqa tieş.
Pekiñda Qıtay tışqı eşlär ministrlığı wäkile Koñ Quan Ğiraqta BMO qoral tikşerülären däwam itüneñ ähämiätlegenä häm zarurlığına basım yasadı. Bügen qoral tikşerüçelär Bağdadnıñ tıyılğan äs-Samud 2 raketalarınıñ yuq itelüen küzätü öçen tağın Ğiraqnıñ xärbi kompleksına kilde. Kiçä Ğiraq 4 şundıy raketanı yuq itte. Bügen tağın 6 raketanı yuq itügä kereşä.
