Accessibility links

Кайнар хәбәр

Xatın-qızlar bäyräme Tatarstanda zurlap ütkärelde


8 mart – xatın-qızlarnıñ tigez xoquqların yaqlaw bäyräme bulsa da, ul demonstratsiä, piketlar ütkärep, xakimiätlärne sügep, yämsezlänä torğan bäyräm tügel xäzer. Xätta, SSSR betep, sıynfi köräş häm sovet ruxı belän suğarılğan säyäsi bäyrämnärneñ abruyı töşsä dä, 8 mart xatın-qızlarnı büläkläw, alarnı zurlaw häm yaz bäyräme bulıp qaldı. Qaldı ğına tügel, tağın da şäbäyep kitte ul. Çönki xäzer elekke sovet cämğiätendäge xatın-qızlar maturraq kienä, tözänä, buyana, qayberäwlärenä mal, dan häm abruy küpläp işelä.

Tereza isemle ber xanımnıñ 10 metrlı räsemen bilgesez eşquar Qazan uramnarına quyğaçtın, bu şayanlıqnı şähär başlığı İsxaqov aldında yalağaylanu dip añlağannar ide. Çönki Tereza Kamalova – anıñ yaratqan qızı. Portretlar yuqqa çıqqaç, İsxaqov tıynaqlıq yulına basqan, dip añladılar. Ämma, 8 mart aldınnan älege räsemnär yañadan päydä buldı. “Vostoçnıy ekspress” gazetası Tereza Kamalova belän äñgämä bastırıp, barlıq serlärne açtı. Bu xanım eşquar, reklama ostası bularaq üze aqça eşli häm dä “Efir” telekompaniäseneñ “FamTV” programmasın da alıp barırğa ölgerä. Älbättä, 4-5 bala üsterep, yarım iserek, buldıqsız ir belän toruçı häm aylar buyı ber külmäk kiüçe xanımnar küpçelek bulmasa da, adım sayın oçrıy. Alar da, xezmäte, aqılı, beleme belän tanılğan xanımnar da, ğadi apalar häm äbilär dä 8 mart aldınnan üzlärenä ayıruça iğtibar kötte.

Räsmi oyışmalar bu yulı ğädättänräk kübräk tırıştı. Piramidada ütkärelgän prezident mäclesendä qatnaşuçılarğa kürsätelgän xörmät şaqqatırğıç ide. Alardan kürmäkçe, Qazan şähäreneñ xatın-qızları klubı mäclese dä şäp itep oyıştırıldı. Rayonnarda, şähärlärdä, ayırım oyışmalarda xatın-qızlarnı onıtmasqa tırıştılar. Çınnan da, Tatarstan xatın-qızları arasında ilne dä, irne dä kütärüçelär, üzläreneñ qabatlanmas zihenen, fidaqärlegen kön sayın kürsätüçelär bik küp. Alarnıñ isemnären atap çığu öçen radionıñ waqıtı da, İnternet säxifäseneñ urını da citmäs ide.
XS
SM
MD
LG