Äydägez äle Tömängä, Tobol'skiğa barıp qaytıyq. Vladimir Putin 8 mart könne anda barğaç, älbättä, xatın-qızlar belän oçraştı. Bala tabu yortın tizräk açtıru öçen tieşle kürsätmälärne dä alar qarşında birde. Ayırılışqanda Rusiä prezidentı borınğı grek filosofı Platonnıñ Tömän häm Seber yaqları turında yazıp qaldırğan süzlären iskä töşerde. Räxmät töşkere, pomoşnikları şundıy qızıqlı sitata tapqannar. Böyek Rifey, yäğni Ural tawları artında, digän Platon, bik küp, bik kiñ häm altınğa, cir astı häm cir öste baylıqlarına bay urınnar, digän. Bu baylıqlarnı ğälämät zur berket qışlar ğına saqlıy. Ul yaqta yäşägän keşelärneñ cir baylıqlarına isläre kitmi. Vladimir Putin belän Tömändä bügen yäşäwçelärgä Platon süzlären ğibrät itep äytte. Platon da, Putin da Rusiä yäki rus keşeläre turında iskä almaw säbäple, älege qoşlar, baylıqlar kemnär belän çordaş digän soraw tua. Qazan ğalimnäre ike dä uylamıyça Seberdä borın zamannarda yäşägän xalıqlarnı iskä aldılar. Xäzerge tatarlar bulmasa da, alarnıñ borınğı törkilär ikänlege bäxässez.
Şulay itep, Platon yazğan süzlärne Vladimir Putin borınğı törkilärgä häm bügenge tömänlelärgä bağışladı. Bügen dä ul baylıqlarnı tabuçılar arasında tatarlar, başqortlar az tügel, bixisap dilär. İke meñ yıl buyı tarqalmağan qärdäş xalıqlar bügen kilep yuqqa çıqmas kebek. Bigräk tä Rusiä başlığı şulay tarixi tamırlarğa iğtibar itkändä. Uz tarixıbıznı patşalarğa da, başqa xalıqlarğa da añlatır zaman citkäç, niçek xäräkät itäbez soñ?
