Accessibility links

шимбә, 10 декабрь 2016, Казан вакыты 11:51

AK partiä citäkçese Recep T. Erdoğan yäkşämbedä deputat itep saylanğannan soñ premyerlıq yulında


Törkiädä xakimiättäge Ğädellek wä Täräqqiät (AK) partiä citäkçese Tayyip Erdoğan yäkşämbedä parlamentqa saylandı. Şulay itep aña premier ministır bulu häm amerikan xärbiläreneñ Törkiedä urnaşuına mömkinlek birgän memorandumnıñ parlamentta ikençe märtäbä tawışqa quyulu öçen yul açılğan buldı. Mäs’älä şunda AQŞnıñ Ğıraqqa höcüm başlauına sanaulı könnär qalğanda, Erdoğan memorandumnı parlamentqa kiterep ölgeräçäkme ?

Bilgele bulğança Tayyib Erdoğan dini propaganda taratqanı öçen xökem itelep, törmädä utırıp çıqqan keşe. Ul noyäber saylaularında qatnaşa almağan ide. Ämma saylaularda ciñep çıqqan islamçı partie konstitutsiene üzgärtte . Yäkşämbedä Törkieneñ könyaq könçığışında Siiirte ütkärelgän saylaularda birelgän tawışlarnıñ 85%ın alıp ul parlamentqa saylandı. Saylau näticäse bilgele bulğannan soñ T.Erdoğan (audio) 2003yılnıñ 9nçe martı xökümätebezneñ demokratiä, qanun häm xoquq öçen köräşendä borılış noqtası bulıp tora dip äytte. Noyäber saylaularınnan soñ premier ministır bulıp bilgelängän Abdulla Gülneñ tizlektä urınınnan çigenäçäge kötelä. Ul yaña kabinetta yä tışqı eşlär , yä dä iqtisad ministırı bulır digän farazlar yöri. İn tiz kiläse atnada yaña xökümätne oyıştırıp eşkä başlayaçaq dip kötelgän Tayip Erdoğannı tışqı säyäsättä ike möhim mäsälä kötä. Berse Kipr bulsa ikençese Ğıraq. Waşington sabırsızlıq belän Törkiedäge üzgäreşlärne qarap bara. Siirttä äle xalıq tawış birgändä, Waşingtonnıñ Ankaradağı ilçese Robert Pearson Ankarada Erdoğan belän söyläşülär alıp bardı. Soñraq ul jurnalistlarğa Ğıraq mäsäläse tikşerelde dip kenä äytep ,başqa detallärgä tuqtalmadı. AQŞ 62meñ ğäskärieneñ Törkiedä urnaşuına röxsät itäçäk parlament qararın kötä.1-nce marttağı tawış birüdä deputatlarnıñ küpçelege raslap tawış birsä dä, kire qaqqan häm tawış birüdän totılıp qaluçılar belän bergä xisaplağanda 4 tawış citmägän ide. Erdoğan yäkşämbe kiç CNNTurk-kä birgän ängämäsendä memorandumnı parlamentqa yañadan täqdim itäçägenä işarä itsä dä, waqıt turında äytü qıyın, BMOda ikençe rezolutsie tawışqa quyılırğa tora, monda xökümät oyıştırırğa kiräk dip söyläde. Erdoğan kördlär tarafınnan kontrol itelgän tönyaq Ğıraqtağı xällärgä borçılu belderep zäğif iqtisad öçen AQŞnıñ yardäm paketı zarur dip söyläde. Ul AQŞ qayber çaralar kürergä , Törkieneñ tönyaq Ğıraqta uynayaçaq role açıqlanırğa tieş dip äytte. Waşington 62meñ xärbineñ urnaşuı tizlektä raslansa cavap itep 30milliard dollarlıq yardäm paketı birergä tora. Ankara tönyaqta bäysez Körd däwläte oyışmayaçaq häm Ğıraqtağı törkmännärneñ xoquqları küzäteläçäk digän garantielär taläp itä Waşingtonnan. Düşämbedä xökümät süzçese Abdullatif Şener belderüenä qarağanda, Gül xökümäte yä sişämbe yä dä çärşämbedä çigenäçäk , kabinetta ällä ni zur üzgäreşlär kötelmi,xökümätneñ bu atnada oyışıp betü ixtimalä zur . Bu älbättä AQŞnı şatlandırır ide . Şul arada İskenderun portına kilgän koraplardan köne töne amerikan qoralları buşaltıla häm çikkä taba yul tota. Törkie parlamentı elegeräk portlarnı häm bazalarnı yañartu öçen 3meñ amerikan xärbienä urnaşu röxsäte birgän ide.

Färidä Xämit, Praga
XS
SM
MD
LG