Accessibility links

якшәмбе, 4 декабрь 2016, Казан вакыты 11:07

General Blount: Küwäyttäge amerikan köçläre Ğiraq suğışına äzer


İminlek Şurasında yaña qarar qabul itü öçen diplomatik tırışlıqlar alıp baru belän bergä Amerika Quşma Ştatları Ğiraq çikläre yanındağı üz xärbi bülekçälären dä suğışnı başlaw xälenä kiterde diärgä bula. Küwäyttäge 3-nçe tup diviziäse başlığı general Blount amerikannarnıñ xärbi äzerlegenä bağışlap andağı jurnalistlar belän oçraşu ütkärde, alar arasında radiobıznıñ xäbärçese dä bar ide.

Şuşı oçraşu barışında general Blount xäbärçelärgä, üz citäkçelegendäge xärbi bülekçälärneñ Ğiraq çige buyında tieşle cirlärgä urnaşıp betep, suğışqa kerergä inde äzer toruwın belderde, anıñ süzlärençä, amerikan ğäskäriläre xäzer barı tik prezident Bushnıñ höcüm başlaw ämeren genä kötä. General Quşma Ştatlarnıñ Küwäyttä urnaştırılğan 3-nçe tup diviziäsenä citäkçelek itä, häm anı anda xätta “timer yodrıq” dip atıylar. Diviziägä yözlägän tank häm qorallandırılğan ğäskäri maşinalar, transporterlar, alarğa yardäm kürsäterlek yök, yağulıq, meditsina maşinaları kerä. Küwäyttä urnaştırılğan başqa amerikan xärbi bülekçäläreneñ qüwäte alay uq zur tügel, alar barısı da, boralaq höcümnären kire qağırlıq xäldä bulsa da, nigezdä yardämçel wazifalarnı ğına başqara. Şuña kürä general Blountnıñ 3-nçe diviziäse Ğiraqqa qarşı suğış başlanğan oçraqta amerikannarnıñ çın mäğnäsendä “timer yodrığı” bulaçaq. Xärbi çaralarğa äzerlek çik buyında ğäskär tuplaw belän genä çiklänmi. Berläşkän Millätlär Oyışmasınıñ Ğiraq çigendäge küzätüçeläre xäbärenä qarağanda, inde berniçä kön buyı Küwäytne Ğiraqtan ayırıp torğan bufer tasmasında, 217 çaqrımğa suzılğan elektr çitänendä tanklar ütärlek tişeklär yasaw bara. Xäbärçelär belän oçraşuwında general Blount, ägär dä Ğiraqqa kerü ämere birelsä , amerikan ğäskärläre şunda uq eşkä kereşep, wäzğiatne tiz arada, Bagdadtağı xakimiatne almaştırırlıq itep üzgärtä ala dip belderde. Anıñ şulay üz-üzenä nıq ışanıp söyläwe, amerikannarnıñ san yağınnan da, sifat yağınnan da östen buluwına nigezlänä. General, 1991-nçe yılğı Farsı qultığı suğışınnan soñ, anı Quşma Ştatlar “Çül buranı” dip atağan ide, bezneñ ğäskäri idarä ostalığı arttı dip isäpli.

Audio

“Çül buranı”nnan soñ bez uz texnologiäbezdä zur sikereş yasadıq, bu üzebezne häm doşmannı kürüdä genä tügel, mäğlümatnı tübändäge xärbi başlıqlarğa citkerä aluda da kürenä. Doşman xälen häm şul uq waqıtta üz xälebezne abaylaw sälätenä min bik ışanam” di Küwäyttäge amerikan generalı. Radiobıznıñ xäbärçese añardan, cirdäge qorallı köçlärneñ amerikan xärbi hawa köçläre belän bergä kileşep eşläwe xaqında soraw birgäç, Blount üzeneñ, Äfğanstanda bulğan xatalarnıñ xäzer inde qabatlanmayaçağına ışanuwın belderde. “Taliban”ğa qarşı alıp barğan suğışında amerikan oçqıçları höcüm xädäflären cirdäge ğäskärilär birgän mäğlümatqa nigezlänep saylıy ide, bu berniçä märtäbä utnıñ üz tarafqa açıluwına kiterde. General Blount xäzer, bezneñ Äfğanstanda qayber problemalarıbız buldı, läkin bez alarnı xäl itü öçen bergäläşep zur eş başqardıq dip belderde.

Audio

54 yäşlek general öçen borçulı ber mäs’älä bulıp Ğiraq yağınıñ amerikannarğa qarşı ximik yä biologik qoral qullanu ixtimalı tora, läkin ul, bu oçraqta da alar üzläreneñ Bagdadqa taba baruwın tuqtatmayaçaq, Quşma Ştatlarnıñ ğäskäriläre andıy höcümnärgä dä äzer tora dip äytte.

Audio

“Bez moña yaxşı äzerlängän, bezneñ yaxşı cihazlarıbız bar. Ğäskär alarnı niçek qullanu künegülären ütte, gärçä min alar qullanılmas dip ömetlänäm” dip belderä general Blount, amerikannarnıñ Küwäyttäge 3-nçe tup diviziäse başlığı. Ul şulay uq üz ğäskärlärenä, mäçetlärdän yä mäktäp binalarınnan üzlärenä höcüm yasalmağan xäldä alarğa qatği töstä berençe bulıp ut açmaw ämeren birüwen äytte.

Kärim Kamal, Praga.
XS
SM
MD
LG