Accessibility links

чәршәмбе, 7 декабрь 2016, Казан вакыты 00:48

Rusiä Ğiraq suğışına fatixa birgän rezolutsiägä qarşı tawış biräçäk


Rusiä Tışqı eşlär ministrı İgor İvanov, Rusiä Ğiraqqa qarşı köç qullanuğa fatixa birgän rezolutsiägä, qarşı tawış biräçäk, dip belderde. İvanov süzlärençä, Rusiä mondıy rezolutsiäne xuplıy almıy, häm ägär ul İminlek Şurasında tawışqa quyılsa, Rusiä qarşı tawış biräçäk. Şuranıñ tağın ber daimi äğzası – Fransiä, şulay uq, andıy rezolutsiägä veto salu ixtimalın beldergän ide.

Quşma Ştatlar, Britaniä häm İspaniä tarafınnan alğa sörelgän rezolutsiä, Ğiraqqa qoralsızlanu öçen kiläse düşämbegä qädär waqıt birä. Şunnan soñ xärbi çaralar qotılğısız bulaçaq. Rezolutsiä ütsen öçen, anı Şuradağı 15 äğzanıñ kimendä 9-ı xuplarğa tieş, berük waqıtta, dami äğzalarnıñ berse dä veto salmasqa tieş. Bügen Fransiä häm Britaniä räsmiläre – Şurada äğza bulıp torğan 3 Afrika däwläte – Angola, Cameroon häm Guinea’nı üz yağına awdaru öçen, bu illärgä säfär çıqtı. Fransiä Tışqı eşlär ministrı Dominque de Villepin belän oçraşqan Angola Tışqı eşlär ministrı üz ileneñ niçek tawış biräçägen äytmäde. Bügen Fransiä prezidentı Jak Ğiraq televidenie aşa çığış yasap räsmi Parijnıñ pozitsiäsen iğlan itergä cıyına. Yaña rezolutsiä tawışqa quyılğan oçraqta, Germaniä kanslerı Gerhard Şröder İminlek Şurası utırışında qatnaşu niäten belderde. Şurada waqıtlı äğza bulğan Germaniä rezolutsiägä şulay uq qarşı çığa. Kiçä Quşma Ştatlar däwlät sekretare Colin Powell, bez İminlek Şurasında 9 tawışqa ireşügä bik yaqın, digän belderü yasağan ide. Bügen Xalıqara Atom energiä agentlığı başlığı Möxämmät Äl-Baradei, Saddamnı suğıştan barı tik, kisken qoralsızlanu qotqara ala, dip äytte.

XS
SM
MD
LG