Accessibility links

җомга, 9 декабрь 2016, Казан вакыты 06:50

Belgradta Serbiä premyer-ministrı Zoran Djindjiç atıp üterelde.


Politsiä äytüençä, Djindjiçqa xökümät binası qarşında atqannar, ber pulya anıñ kükrägenä, ikençese arqasına tigän. Premyer-ministr urınbasarı Neboysya Koviç jurnalistlarğa Djindjiç xastaxanädä ülde dip belderde. Serbiä xökümäte aşığıç utırışqa cıyıldı. Şahitlär äytüençä, höcümnän soñ ike keşe qulğa alınğan. Belgrad uramnarında politsiä maşinalarnı tikşerä başladı. Başqaladağı televidenielär köndälek tapşıruların üzgärtte. Uzğan ayda Belgradta Premyer-ministr maşinasına ber maşina kilep bärelgän ide. Ul qaza da Djindjiçqa qarşı maxsus höcüm bulırğa mömkin dip bäyälänä. Könbatış yaqlı reformaçı Djindjiç elekke Yugoslaviä prezidentı Slobodan Miloşeviçnı xakimiättän bärep töreşü eşeneñ citäkçelärennän berse buldı. Serbiä millätçeläre Miloşeviçnı BMO suğış cinayätläre näxkamäsenä tapşıruğa kertkän öleşe öçen Djindjiçnı qatı tänqitläp kilde. Djindjiç Serbiä xökümäten 2001-nçe yılnıñ ğinwarınnan birle citäkläde. Bıltır Pragağa, Azatlıq Radiosına kilgäç, Djindjiç problemalarnı kürmämeşkä sabışuğa qarağanda alarnı çişüne östenräk kürüe turında çığış yasadı. Uzğan ayda ul Kosovonıñ kiläçäk statusı turındağı söyläşülärne kiçekmästän başlap cibärergä çaqırdı. Djindjiçnı tänqitläwçelär bu adımnı saylaw aldı ğämäle dip bäyäläde.

XS
SM
MD
LG