Accessibility links

шимбә, 10 декабрь 2016, Казан вакыты 08:13

“Yaña ğasır” kanalı respublikadan çittä tügel, qayber Tatarstan awıllarında da kürsätmi.


Kemneñ mäğlümatı bar, şul dönya belän idärä itä, dip äytälär. Läkin Tatarstannan çittä yäşäwçe tatarlarğa, xatta respublikanıñ üzendäge qayber millättäşlärebezgä dä, bu süz qağılmıy. Küp byudjet aqçaları kitkän häm millättäşlärebez zarığıp kötkän «Yaña ğasır» kanalı, respublikadan çittä tügel, Tatarstannıñ här awılında häm şähärendä dä kürsätmi bulıp çıqtı. Mäsälän, Aznaqay, Aqtanış, Yutazı, Bögelmä yaqlarına Qazannan söylängän süz işetelmi. Anda signal barıp citmi ikän. Çärşämbedä xökümät wäkilläre, Elemtä ministrlığı häm başqa şundıy cawaplı oyışmalar älege mäs’äläne qarap, şuşı tawlı yaqlarda tapşırğıçlar quyarğa xäl itkän. Bu eş yıl axırına qädär tämamlanırğa tieş, şunnan soñ ğına, Tatarstannıñ «Yaña ğasır» kanalı respublika televidenie çeltären 100% qaplıy dip äytep bula.

Tatarstannıñ «Yaña ğasır» kanalında xäzer texnik mäs’älälärne çişü belän bergä, icadi plannar da qoralar. 1 martta ütkän «açıq» efir könennän soñ, tapşırular yaña tärtiptä alıp barıla başladı. Bu xaqta häm başqa küp sanlı mäsällär turında «Yaña ğasır» tele-radio kompaniäseneñ räis urınbasarı Miläwşä Aytuğanova belän äñgämä qordıq. Söyläşüne «Yaña ğasır» kanalına sputnik tälinkäse aşa totaşu tärtiben açıqlawdan başladıq.

Miläwşä Aytuğanova :

AUDİO: Anıñ öçen NTV+ tälinkäsen alıp köylärgä kiräk. Bezneñ tapşırular Evtelsat-w4 sputniğı aşa alıp barıla, kanalıbıznı tabu öçen tälinkäne 36° k. o. ( könçığış ozınlıqqa) quyarğa, anıñ üzäk yışlığı 12 226 mGz. Monı añlaw bik awır bulsa, bezgä (8432) 43-32-11 telefonınnan şaltıratıp, tulıraq mäğlümat ala alasız. Min Yekaterinburga barıp qayttım, küptän tügel, anda şähärneñ ber rayonında kabel TV aşa bezneñ kanalnı qaraw mömkinlege bar. Tatarlar yäşägän awıllarda, kitapxanädä, mäktäptä, şulay keşe cuyıla torğan urınnarda sputnik tälinkäsen quyu turında söyläşülär alıp bardım.

Miläwşä xanım äytüençä, şuşı «Yaña ğasır» kanalın kürşe töbäklär genä tügel, Xantı-Mansiyskiy şähärennän alıp Hel’sinki qalasına qädär arada qarawçılar bar. Alğa taba kanalnıñ 18 säğätlek efirnıñ yartısı tatar telendäendäge tapşırularğa bireläçäk. Yaña programmalarnı çığara başlawğa da äzerlek bara. Televidenieñ tağın ber probleması bar, ul da bulsa tatarça belğän häm zamança fikerli torğan jurnalistlar citmäw ikän. Alayda, «Yaña Ğasır» kanalı töşenkelekkä birelmi, Tatarstanğa ğına tügel tatarlar yäşägän töbäklärgä dä küz ata. Yaqın arada Televidenie citäkçelege tatarlar küpläp yäşägän töbäklärdä üz xäbärçelären buldırırğa teli. Miläwşä Aytuğanova bu xaqta bolay dide :

AUDİO:İñ kimendä 4 töbäktä buldırırğa tırışırbız. Tatarlar küpläp yäşägän Yekaterinburda, Udmurtiädä, Permdä, Tömändä xäbärçelär byurosın buldıru kiräk. Mäskäwdä häm Piterburda da xäbärçelär bulsa yaxşı bulır ide. Alla birsä, ber yıl eçendä bez şundıy byurolar açırbız.

XS
SM
MD
LG