Accessibility links

җомга, 9 декабрь 2016, Казан вакыты 03:15

Bar Serbiä buylap premyer-ministr Djinjicne üterüçelärne ezläw bara


Bar Serbiä buylap moña qädär kürelmägän ğädättän tış çara, cinayätçelärne awlaw bara, premyer-ministr Zoran Djinjicne üterügä qatnaşı buluda şiklänelep totqarlanğan keşelär sanı inde 70-tän artıp kitkän. Läkin alar arasında älegä serb premyerına höcümne turıdan-turı başqaruçılar yuq dip xäbär itelä. Xökümät başlığı wazifaların ütägän Nebojsa Çoviç barı tik, alarnıñ elekke prezident Slobodan Miloşeviç tirälegenä bäyle buluwı xaqında ğına belderde.

Premyer Djinjickä höcüm oyıştıru öçen bar cawaplılıqnı Serbiäneñ xäzerge xakimiate baştan uq ildäge oyışqan cinayätçel törkemnärgä yökläsä dä, xäzer inde monıñ artında bilgele säyäsi dairälär toruwı turında da belderülär kürenä başladı. Höcümgä qatnaşı buluda şiklänelep 70-tän artıq keşene totqarlağannan soñ serb politsiäse wäkilläre, alar barısı da, elekke yugoslav prezidentı Slobodan Miloşeviç tirälegenä bäyle bulğan cinayätçel törkemnän dip belderde. Başqala Belgradnıñ Zemun bistäse isemen yörtkän şul klan Serbiädä genä tügel, bar Balkanda da iñ zur kriminal’ çeltärne täşkil itä häm Zoran Djinjicne üterü näq menä anıñ eşe dip isäpli serb politsiäse. Soñğı qulğa alular xaqında mäğlümat birgän Nebojsa Çoviç, ul xäzer waqıtlıça premyer-ministr wazifaların üti, politsiäneñ, Miloşeviç çorında däwlät iminlege köçlären citäklägän Yovitsa Stanisiçnı häm anıñ urınbasarı Franko Simatoviçne totqarlawın xäbär itte. Bosniä häm Xorvatiä suğışları waqıtında, yäğni 90-nçı yıllar başında Simatoviç serb yarımxärbi bülekçälären çitäklägän ide. Şuşı ike keşe üz wazifalarınnan inde küptän azat itelsä dä, alar xätta Miloşeviçne xakimiattän çitlätkännän soñ da üzläreneñ politsiä wä maxsus iminlek köçlärendäge yoğıntısın saqlap qala aldı dip farazlana. 1997-nçe yılda Simatoviç urınına Milorad Lukoviç bilgelände, häm näq menä ul bügenge köngä qädär Zemun törkemen citäkläp kilde dip belderä politsiä. Zoran Djinjicne üterüçe bularaq ta berençe çiratta Lukoviç iseme äytelä. Tikşerüçelär fikerençä, höcümne oyıştıruçılar öçäw bulğan, alar Serbiä premyerına uramnıñ qarşı yağındağı öydän ut açqan häm şunda uq cinayät urının taşlap kitkän. Höcümçelärneñ berse dä äle haman da totqarlanmağan, şul isäptän Lukoviç ta. Comğa könne İnterpolnıñ Bosniä başqalasındağı wäkilläre anıñ Sarayevoda kürenep alğanın xäbär itte, läkin ul anda çınnan da bulğanmı, yuqmı, axırğı çiktä anıq raslanmadı. Lukoviç, Simatoviç häm Stanisiç bäyläneşlären istä totıp serb xakimiate Djinjicne üterüneñ elekke prezident Miloşeviç tirälegenä bäyle buluwın alğa sörä. Premyer wazifaların ütäwçe Çoviç bu uñaydan, Miloşeviç zamanında törle oyışqan cinayätçel törkemnär, suğış cinayätçerläre häm şul suğışlardan fayda kürüçelär arasında tığız elemtälär buldırıldı häm märxüm Zoran Djinjiçneñ alarnıñ barısına qarşı da köräş başlap cibärüwe şul dairälärne yarsıtıp alarnıñ elekke xälne saqlap qalu maqsatında reformaçıl premyer-ministrnı üterüwenä kiterde dip belderde. Serbiädä haman da ğädättän tış xäl iğlan itelgän kileş qala birä, şuña nigezlänep politsiä keşelärne ğäyepläwlär beldermi genä dä 30 köngä qädär totqarlıy ala. Xökümät belän idarä itü xäzer üterelgän premyernıñ urınbasarları qulında, alar premyer-ministr wazifaların çiratlaşıp başqaraçaq. Comğa könne märxüm Djinjiçneñ demokratik partiäse bu urınğa 42 yäşlek Jivkoviçne täqdim itärgä cıyına digän xäbärlär kürende, ul elekke premyernıñ yaqın tarafdarı, zamanında ilneñ könyağındağı Niş şähärendä xakim bulıp torğan keşe. Zoran Djinjicne cirläw yolası şimbä könne uzaçaq.
XS
SM
MD
LG