Accessibility links

якшәмбе, 4 декабрь 2016, Казан вакыты 13:20

AQŞ prezidentı George Buş yäkşämbe könne Britaniä premyer-ministrı Tony Blair häm İspaniä premyer-ministrı Jose Maria Aznar belän oçraşıp Ğiraq krizisı turında söyläşergä cıyına.


Aq Yort wäkile Ari Fleischer äytüençä, Portugaliäneñ Azores utrawlarında ütäçäk sammitta Ğiraq krizisın diplomatiä aşa çişü yulları häm BMO resolütsiäse turında süz baraçaq. İspaniä, Britaniä häm Quşma Ştatlar BMO İminlek Şurasında Ğiraqqa suğıştan qotılıp qalu öçen qatğıy taläplär quyuçı rezolütsiä qabul itüne yaqlıy. Ämma İminlek Şurasınıñ qayber daimi äğzaları andıy resolütsiä proyektına veto salırğa mömkin. Fleischer äytüençä, Quşma Ştatlar bu resolütsiäneñ kiläse atnada tawışqa quyıluın teli. Fransiä Prezidentı Jacques Chirac Ğiraq krizisın çişü öçen Britaniä belän bergäläp eşlärgä teläwen beldersä dä, Fransiä avtomatik räweştä suğış başlanuğa yul quyuçı BMO resolütsiäsen kire qağaçaq dide. Fransiäneñ Prezident idaräse äytüençä, Chirac bügen telefon aşa Britaniä premyer-ministrı Blair belän söyläşkändä tağın ber märtäbä, Ğiraqnı qoralsızlandıru BMOnıñ moñarçı qabul itelgän resolütsiäse nigezendä barırğa tieş dip äytkän. Russiä dä täqdim itelgän yaña rezolütsiägä qarşı çıqtı. Russiä tışqı eşlär ministrı urınbasarı Yuri Fedorov Britaniäneñ 6 taläp quyu täqdime suğıştan qorılıp qalu öçen konstruktiv täqdim tügel dide. Ğiraqtağı BMO qoral tikşerüçeläre tıyılğan äs-Samud raketaların beterü däwam itä dip belderde.

XS
SM
MD
LG