Accessibility links

шимбә, 3 декабрь 2016, Казан вакыты 03:27

Başqortstan tatarları saytı buldırıldı


Bu könnärdä internetta millättäşlärebezgä qağılışlı tağın ber sayt päydä buldı. Ul Başqortstan tatarlarına bağışlanğan. Anı yasawçı Azat Säyfetdinov inde tatarlarğa qağılğan berniçä sayt açtı. Komp'yuterın da şul maqsat belän satıp alğan ikän. Berniçä yıl elek buldırılğan tatar-millet.narod.ru saytınnan da dönyanıñ törle poçmağında yäşäwçe tatarlar xaqında mäğlümat alıp bula. Ä xäzer yasağan saytın ul kiläçäktä kamilläşterergä uylıy. Başqortstan tatar milli oyışmaları belä elemtägä kerep eşlärgä isäpli.

Saytta barlığı yözdän artıq mäqälä bar. Şular arasında Bäläbäy tatar gimnaziäse direktorı Nurmöxämmät Xösäyenov belän äñgämälär, tatar milli oyışmaları, Başqortstanda tellär turında qanun qabul itkändä tatar telen teşerep qaldıru, xalıq sanın alğanda millättäşlärebezne başqort dip yazdıru, başqort ğalimnäreneñ tarixnı bozıp kürsätü turında iğtibarğa layıqlı yazmalar urın alğan.

Saytnıñ kitapxanäsendä Aydar Xälimneñ, Ğayaz İsxaqinıñ kitapları urın alğan. Kiläçäktä anda mädäniätebez, danlıqlı keşelärebez turında da säxifälär buldırılaçaq.

Azat Säyfetdinov saytqa forum da, kunakxanä dä urnaştırmağan. Ber—bersenä pıçraq atarlar dip qurqam. Bezgä härqaysıbıznıñ xoquqların tanıp, ber—berebezne xörmät itep, qärdäşlärçä yäşärgä kiräk dip belderä ul. Küptän tügel genä Başqortstanda Tatarstan delegatsiäse bulıp qayttı. «Tatarstan yaña ğasır» televideniese şunıñ buyınça maxsus tapşıru äzerlägän. İke atnağa ber çığuçı «Tatarlar» tapşıruına bu yulı tarixçı Damir İsxakov, tatar milli—mädäni moxtäriäte räise Rimzil Wäliev, Gäbdelbär Fäyzraxmanov çaqırılğan ide. Tapşıru Başqortstannan alıp qaytqan mäğlümat belän ürelep bardı. Yanawl rayonınıñ çep—çi tatar bulğan Asawdıbaş awılı mäktäbenä Tatarstan televideniesen kertmägännär. Uqıtu bülege mödire: «Bez başqortlar, başqortça söyläşäbez»,—dip işek töbennän ük kire borğan. Awıl xalqı isä üzem tatar, pasportım buyınça başqort dip açıqtan—açıq äytkännär. İmeş, Başqortstanda yäşägäç monıñ närsäse bar. Anıñ adresı – tatar-bashkort.narod.ru

XS
SM
MD
LG