Accessibility links

пәнҗешәмбе, 8 декабрь 2016, Казан вакыты 15:00

“Единая Россия” firqäseneñ Tatarstan bülege konferensiäse


Başqortstandağı saylawnıñ tağın ber ähämiätle yağı bar. Tatarstanda şuşı yılnıñ dikäberendä bulaçaq saylawlarda häm Rusiä Däwlät Dumasına saylawlarda nindi partiä östenlek itäçäk soñ? Xäzer respublikalarda, töbäklärdä möstäqil partiälär oyıştırırğa yaramıy, barı tik federal' firqälär genä üzläreneñ töbäk bülekçälären aça ala. Başqortstannan ayırmalı bularaq, Tatarstanda saylawlar partiä isemlekläre buyınça da ütäçäk. Yäğni, Tatarstan parlamentına deputatlar sanınıñ yartısın okruglarda saylayaçaqlar, ä ikençe yartısın iñ küp tawış cıya alğan firqälär üz isemlekläre buyınça täqdim itäçäk. Elekke Sovetlar Berlegendä ber genä real' partiä - Kommunistlar firqäse barlığın iskä töşergändä, yaña firqälärneñ qaysısı xakimiätkä kilüe aktual' mäsälä bulıp tora. Kommunistlar dilbegäne almağan xäldä kemnär alaçaq soñ? Bu sorawğa cawap iğlan itelde inde. “Berdäm Rusiä” –“Единая Россия” firqäse kiläçäktä parlament küpçelege bulırğa häm başqarma xakimiätkä dä kilergä cıyına. Bu plannarnıñ nigezendä administrativ resurs, administratsiä wäkilläreneñ mömkinlekläre häm aqça tabu forsatları tora.

Soñğı waqıtta LDPR, Jirinovskiy firqäse üzeneñ abruyın arttırdı, “Жизнь'” dip atalğan ber yaña firqä Tatarstanda aktiv eş cäyelderä. Räfqät Altınbaev imzası belän şuşı firqä isemennän 8 Mart bäyräme belän xatın-qızlarnı täbrik itep, räsemle xatlar taratu da iğtibarnı cälep itte. 15 martta “Жизнь'” firqäseneñ Çallı bülege citäkçese Nursinä Äbdraşitova partiägä 4-5 meñ Çallı keşese yazıluın İntertat.ru xäbärçesenä äytkän.

Älbättä, dilbegä totarğa, däğwä itärgä barı tik ber genä firqä sälätle - şul uq “Единая Россия”. 29 martta şuşı firqäneñ çirattan tış qorıltayı bulaçaq. Anda partiä Ustavına tözätmälär kertep, citäkçelekne üzgärtep, eşne yañartıp cibärergä tieşlär. Yedinoroslarğa yaña qibla birüçelär arasında Tatarstannan saylanğan deputat Oleg Morozov ta bar. Şimbä könne Oleg Morozov citäkçelegendäge ideologik komissiä äzerlägän Manifest Tatarstan yedin-urısları tarafınnan tikşerelde. Vladimir Putinnıñ töp tayanıçı bulırğa cıyınğan firqäğä ör yaña ideologiä birüçe Qazan keşese bulğaç, tatarstanlılarnıñ bu xälgä mönäsäbäten belü ähämiätle. Şimbä könne “Единая Россия”neñ Tatarstan bülege dä çirattan tış konferensiä ütkärep, älege Manifestnı xupladı häm Ustavqa täqdim itelgän ber distä üzgäreşne rasladı. Mäskäwdä bulaçaq çirattan tış qorıltayğa 7 delegat saylandı. Ğinwar axırında Tatarstanda yedinoroslarnıñ sanı 14 meñ bulğaç, här ike meñ keşedän ber delegat saylanğaç, menä şul cide urın kilep çığa da inde. İke säğät däwam itkän şuşı konferensiä Tatarstandağı xakimiät firqäseneñ nindiräk xäldä buluın añlarğa yärdäm itte.

Bu şulayraq buldı. Şimbä könne irtänge säğät 11-dä Qazan energetika institutınıñ binasına distälärgä avtomobillär yünälde. İnstitutnıñ Zur konferensiä zalında yözdän artıq delegat häm berniçä distä qunaq tawışsız-tınsız kerep utırğannan soñ, “Единая Россия”neñ citäkçese Yuriy Näcmiev forumnı açıp cibärde. Zalda utıruçılar arasında elek obkom, raykom tiräsendä yörgän abzıylar häm apalar, qayber rayon başlıqları, eşquarlar küpçelekne täşkil itte. Prezidiumğa Mäskäwdän qaytqan Rusiä deputatları Oleg Morozov, Färidä Ğaynullina, Mixail Rokitskiy, Nail Xösnetdinov ta utırtıldı. Färit Möxämmätşin citäkçelegendäge “Tatarstan yaña ğasır” xäräkäteneñ liderları, respublika xalıq deputatları monda küzgä taşlanmadı. Prezident apparatı citäkçese Äqzam Ğöbäydullin “Единая Россия” firqäseneñ räistäşe Mintimer Şäymiev isemennän täbrik süze uqıp birde. Yuri Näcmiev firqäneñ respublika bülegendä yañalıqları turında xisap birde, Nail Xösnetdinov firqäneñ yaña manifestı turında notıq söyläde, tağın biş keşe üzläreneñ xisap-fikerlären 4-5 minut eçendä äytep birdelär. “Milli uñış yulı” dip atalğan bu Manifest turında ayırım ber utırıp söylärgä kiräk. Ul 18 bittän tora. Töp fikere - 21 ğasırda Rusiäne ayaqqa bastıru eşenä alınuçı partiä xäzerge burıçlarnı ütärgä häm zur maqsatlarğa ireşergä sälätle, dip äytelgän anda. Elekke zamannarnı iskä töşergän “Есть такая партия!” digän cömlä Manifestnıñ berençe bitendä ük. Monıñ öçen Rusiä xalqınıñ berdäm ixtıärı häm tarixta bulmağança qüätle kollektiv ğämällär kiräk. Bu tırışlıq, köçänü, urısça äytkändä - “усилия” Rusiädäge küp xalıqlarğa tayana. Häm ul kosmosqa omtılu belän çağıştırırlıq.

Manifestta “Berdäm Rusiä”neñ Milli uñış formulası, ciñügä baru yulları kürsätelgän. Çınnan da, bu partiä ğädättän tış zur eşkä alına. Böten il, böten xalıq uñışı häm üseşe öçen cawap birergä äzerlänä. Konferensiädä qatnaşuçılar häm xalıq moña ışansın öçen Oleg Morozov östämä çığış yasadı. Ägär dä barlıq başqarma xakimiät, barlıq säyäsi köçlär tuplanıp, ber maqsat quya ikän, bu ezsez qalmas, älbättä. Bigräk tä däwlät çinovniklarnıñ, eşquarlarnıñ mömkinlekläre ber urında tuplansa. Şulay da, Milli uñış digän süzdän qurquçılar da buldı. Çönki milli digän töşençä Manifestta gomumrusiä däwlät häm xalıqnıñ berlege mäğnäsendä birelgän. Ä rus häm tatar telendä milli uñış häm milli küpçelek terminnarınıñ mäğnäse etnik küpçelek, millät uñışı - ber millät uñışı kebek qabul itelä. Änwär Möxämmätzakirov, Rimma Ratnikova menä şuşı “milli” digän süzne üzgärtergä täqdim ittelär. Ğomumän, milli säyäsätkä kübräk iğtibar itü kiräklege äytelde. Alabuğa pedagogiä institutı rektorı Nail Mansur ulı Wäliev Fännär akademiäseneñ gumanitar bülege akademik-särqatibe bularaq ta çığış yasap, keşelärne tärbiäläw öçen balalar, yäşlär oyışmaları, komsomol, pioner berlekläre kebegräk strukturalar kiräklege turında söyläde. “Berdäm Rusiä” partiäseneñ eşlärenä fänni fikerläw yärdäm itärgä, Tatarstan fännär akademiäseneñ ğalimnärneñ potensialın partiä eşenä cigärgä kiräklegen äytte Nail Wäliev. Tatarstan häm tatar xalqınıñ mänfäğätlären yaqlaw turında küp söyläp tormasalar da, Norlat şähäre citäkçese Fatix Sibgatullin, yäşlär oyışması citäkçese Dmitriy Vtorov, Bögelmä wäkile Ferdinand Timerxanov Tatarstan şartlarında säyäsät belän eşläw turında qızıqlı fikerlär äyttelär.

İrtäme-soñmı “Единая Россия”neñ Tatarstan bülege üzeneñ qiblasın tabar, respublika xalqınıñ mänfäğätlären yaqlaw yulına basar, digän ömet belän taraldılar konferensiägä kilüçelär. Xäzergä matdi häm oyıştıru ideologik yaqtan zur qıyınlıqlar kiçerüçe bu oyışmanıñ saylawda küpme tawış kiteräçägen äytep bulmıy. Partiäsez yäşärgä künekmägän xalıq ta qızğanıç, bügenge kön şartlarında yañaça eşlärgä öyränmägän säyäsi oyışma üze dä qızğanu xise uyata.

XS
SM
MD
LG