Accessibility links

пәнҗешәмбе, 8 декабрь 2016, Казан вакыты 03:25

Rusiä general' prokuraturası Tatarstan Däwlät Şurasına tağın ber kisätü yasadı


Şunısı qızıq, federal' üzäk respublikağa qarata säyäsätne ber qulına perännek, ikençe qulına çıbırqı totıp alıp baruın yäşerep tä tormıy. Sergey Kirienko xörmätläp, büläkläp yörgän waqıtta uq Rusiä general' prokurorınıñ İdel buyı federal' okrugı buyınça urınbasarı Sergey Gerasimovnıñ Rusiä Yuğarı mäxkämäsenä Tatarstan Yuğarı mäxkämäseneñ 31 ğinwarda çığarğan qararın yuqqa çığaru turında küzätçelek ğarizası tapşırğanı mäğlüm buldı. Tatarstan Yuğarı mäxkämäse älege qararında Tatarstan Däwlät Şurasınıñ Tatarstan Konstitutsiäsenä qarata mäxkämälär qararların ütäwdän çitläşü faktın raslaw turında Rusiä Federatsiäse general' prokuraturası ğarizasın kire qaqqan ide. Xäbär itep kilüebezçä, Tatarstan xoquq saqlaw oyışmalarınıñ Rusiä general' prokuraturası belän Tatarstan Konstitutsiäse xaqında tartqalaşuı inde ber yıl çaması bara. General' prokuratura Tatarstan Konstitutsiäseneñ däwlätçelek, möstäqillekne çağıldıruçı maddälären ğämäldän çığarırğa teli. Tatarstan Yuğarı mäxkämäse mondıy protestlarnı xoquq normalarına, Rusiä qanunnarına tayanıp, kire qağa. Bu yulı Rusiä general' prokurorı urınbasarı Sergey Gerasimov Rusiä Federatsiäse Yuğarı mäxkämäsenä prokuratura cıyğan materiallarğa bäyä birep, Rusiä prezidentına, Tatarstan Däwlät Şurasına kisätü yasaw wäkälätlären qullanırlıq qarar çığarırğa tieş, dip sanıy.

Yunıs Ätnäle, Qazan

XS
SM
MD
LG