Accessibility links

якшәмбе, 11 декабрь 2016, Казан вакыты 16:45

AQŞ häm koalitsiä köçläreneñ Ğiraqtağı höcümnäre däwam itä.


Şimbägä qarşı töndä häm şimbä irtäsendä AQŞ häm koalitsiä oçqıçlararı Bağdadnı häm tönyaqtağı Mosul, Kirkuk, Tikrit şähärlären bombalawnı däwam itte. Bügen Bağdadta kön yaqtılığında berniçä köçle şartlaw buldı. AQŞ xärbiläre Yefrat yılğası tiräsendä, Nasiriä şähäre yanında Ğiraq köçläre belän bäreleşä. Quşma Ştatlar Säddam Xösäyen xakimiäte ildä kontrol’ne yuğalta bara dip belderä. Yefrat belän Tigris yılğaları quşılğan tirädän, AQŞnıñ 3-nçe cir öste diviziäsennän Azatlıq radiosı xäbärçese Ron Synovitz Nasiria yanındağı suğış turında bolay dip xäbär itte:

AUDİO: Yefrat yılğası yanında çolğap alınğan Ğiraq soldatları belän AQŞnıñ cir öste ğäskärläre arasında qatı atış bara. AQŞ soldatlarınıñ berniçä märtäbä birelüne taläp itüenä qaramastan Ğiraq saldatları birelüdän baş tarta.

Soñraq Ron biredä amerikannar ber urınğa cıyılğan 100-läp Ğiraq soldatın äsirlekkä aldı dip belderde. Qayber xärbi küzätüçelär fikerençä, kiläse atna başında 3-nçe cir öste diviziäse häm başqa ğäskärlär Bağdad yanına kilep citärgä mömkin.

Yılğa buylap 200 çaqrımlap könçığıştaraq, zurlığı yağınnan ikençe urında torğan Basra şähäre yanında Ğiraqnıñ 51-nçe cir öste diviziäse AQŞ häm Britaniä köçlärenä birelde. Pentagon äytüençä, bu diviziädä 8 meñ soldat, 200 tank bar. Ämma şularnıñ küpmese birelüe turında tögäl mäğlümätlär älegä yuq. Bu diviziä Ğiraqnıñ başqa ğäskärlärdän yaxşıraq qorallanğan köçläreneñ berse dip sanala. Ul könyaqtağı 3 diviziäneñ berse häm Basranı saqlawçı töp köç ide. Kiçä ğiraqnıñ könyağında qoral taşlağan soldatlar küp buldı. Ämma 51-nçe diviziä - beryulı qoral taşlağan iñ zur törkem.

Waşintonda AQŞ xärbi hawa köçläre generalı, Berläşterelgän ştab başlığı Richard Myers ğiraqlılarnıñ qoral taşlawın xuplawı turında belderde:

AUDİO: Ğiraqnıñ qayber soldatları birelä häm ilneñ könyağında da, tönyağında da üz pozitsiälärennän kitä. Küp kenä Ğiraq xärbiläre Säddam Xösäyen öçen suğışuğa qarağanda Ğiraqnıñ kiläçäge öçen suğışunıñ yaxşıraq ikänen turında añlatırğa telägänebezne qabul itä.

Comğa könne Myers aldağı täwlek eçendä Ğiraqta yözlärçä hädäf bombalanaçaq dip äytte.

AQŞ saqlanu ministrı Donalf Rumsfeld jurnalistlarğa Säddam häm anıñ yardämçeläre Ğiraq xärbilären elekkeçä idarä itä almıy dide:

AUDİO: Ğiraq räsmiläre arasında butalçıqlıq arta bara. Alarnıñ suğış qırındağı wäzğiät belän tanışu, üz köçläre belän elemtägä kerü häm üz illären kontrol’dä totu mömkinlekläre kimi bara. Minemçä, alar xäzerge xakimiätneñ inde tarixta ğına qaluın añlıy başlıy.

Könyaqta koalitsiä köçläre Ğiraqnıñ üzägenä, Bağdadqa taba çağıştırmaça tiz xäräkät itsä dä, Bağdad yanında Säddamnıñ iñ yaxşı armiäse bulğan Respublika saqçıları berençe qatı qarşılıqnı kürsäter dip kötelä.

AQŞ häm Britaniä köçlärenä Tönyaqta xäräkätne ciñeläytüçe qarar qabul itelde. Comğa kiçendä Törkiä saqlanu ministrı Vecdi Gonul Törkiä xökümäte koalitsiä oçqıçlarına üz hawa kiñleklären aça dip belderde. Elegräk Ankara Ğiraqnıñ kördlär yäşägän tönyaq öleşenä Törkiä ğäskärlären kertügä röxsät aluğa ireşü öçen hawa kiñleklären açmıy torğan ide. Gonul bu qararğa niçek ireşelüen äytmäsä dä mondıy belderü yasadı:

AUDİO: Axır çiktä, hawa kiñleklären açu Törkiä mänfäğätlärenä turı kilä digän qarar qabul itelde.

Ul arada könbatış xäbär agentlıqları 1000-1500 törek xärbieneñ tönyaq Ğiraqqa kerüe turında xäbär itte. Biredä moñarçı da törkiä ğäskärläre ğisyançı kördlärgä qarşı xärbi çaralar alıp bara ide. Törkiä premyer-ministrı Ğiraqqa ğäskärlär cibärüne Törkiägä qaçaqlar ağımı buldırmaw häm kördlärneñ terror ğämällären çikläw teläge belän añlattı.

Dönyanıñ törle şähärlärendä Ğiraq suğışına qarşı demonstratsiälär bügen dä. Bügen Londonda da zur demontstratsiä kötelä.

Naif Aqmal, Praga
XS
SM
MD
LG