Accessibility links

якшәмбе, 11 декабрь 2016, Казан вакыты 14:57

Ğiraqta xärbi bäreleşlär genä tügel, mäglümät suğışı da bara


Ğiraqta xärbi bäreleşlär genä tügel, ä berük waqıtta mäglümät suğışı da bara, xörmätle tıñlawçılar. Törle çığanaqlardan kilgän mäglümätlär, ber-bersennän ayırıla, yış qına qarşı kilä. Koalitsiä citäkçeläre yasağan belderülärne Ğiraq räsmiläre kire qağa häm üz belderülären yasıy...

Mäglümät suğışı Ğiraq kampaniäseneñ möxim öleşenä äylänep bara. Kampaniäneñ berençe 3 köne moña inde citärlek misal birde. Comğa könne Quşma Ştatlarnıñ saqlanu ministrı Donald Rumsfeld Amerikan xärbiläreneñ Ğiraqnıñ könyağındağı berdän-ber portı Umm Qasr şähären aluları turında belderde. Britan räsmiläre Faw yarımutrawın häm şundağı neft çığanağın aluların äytte. Ğiraqnıñ mäglümät ministrı Säet Äl-Sahaf bu belderülärne yalğan dip atadı. Näq şundıy qarşılıqlı xäbärlär Basra şähäreneñ alınuwı turında kilde.

Tağın ber bäxäsle mäsälä – Ğiraq xärbiläreneñ birelü ğämäle. Şimbägä qarşı töndä Ğiraqnıñ 51-nçe diviziäse birelgän digän xäbärlär taraldı. Bu diviziädä 8 meñ xärbi sanala. Alar barısı bergä birelgänme, öleşçäme, ällä diviziä komandirı üze genäme, şulay uq, tulı mäglümät yuq. Ğiraq yağı isä, bu keşelär xärbilär tügel, ğadi sivil keşelär dip belderä.

Şimbägä qarşı töndä Ğiraqnıñ berniçä urını, şul isäptän Bagdad qalası bik köçle utqa totıldı. Dönya telekompaniäläre bu xöcümne turı efirda kürsätte. Ğiraq yağı, ğadi xalıq arasında 200-dän artıq yaralanuçı häm 3 ülüçe dide. Britaniäneñ saqlanu ministrı Geoff Hoon monı xöcümnärneñ bik tögäl yasaluwı belän añlattı:

Audio: Uzğan töndä bulğan köçle xöcümneñ maqsatı – Ğiraqnı cir belän tigezläw tügel. Bez Ğiraqnıñ rejimına zıyan kiterergä, ä menä infrastrukturanı mömkin qädär saqlap qalırğa tırışabız. Televideniedä kürengäçänçä, xäcümnärneñ köçle buluına qaramastan, Bagdadta xättä utlar sünmäde, ä menä xakimiät binalarına zur zıyan kilde.

Bombalawlar şimbä irtäsendä tañ atqaç ta däwam itte. Bu Pentagon taktikasında yañalıq bulıp tora. Bombalar kön yaqtısında da qoyıla başladı. Ul arada koalitsiä saflarında inde yuğaltular bar. Tönğe operatsiä waqıtında Farsı qultığı östendä Britaniäneñ ike boralağı bäreleşep suğa töşte. Andağı 7 xärbineñ barısı da xäläk buldı.

Nixayät, koalitsiä saflarında tağın ber qarşılıq barlıqqa kilde, ul da bulsa Törkiä mäsäläse. Bilgele bulğança, Ankara nixayät, koalitsiä oçqıçlarına üz küge aşa oçarğa röxsät birde. Läkin almaşqa, tönyaq Ğiraqqa üz xärbilären kertü taläben quydı. Törek räsmiläre monı qaçaqlarnı kontrol itü, häm ul töbäktäge kördlärneñ, Ğiraq suğışınnan faydalanıp üz däwläten tözü niätenä qarşı toru teläge belän añlata. Mäglümät çaraları 1500 törek xärbineñ inde Ğiraqta buluwın xäbär itä. Bu xäbär Pentagon räsmiläreneñ açuwın çığardı. Alar älbättä monı telämäde, häm Ankarağa bu turıda açıqtan açıq kisätep kilde. Waşington - Ğiraqnıñ tönäyğındağı körd opozitsiäse belän xezmättäşlek itä, yağni anıñ öçen kördlär dä töreklär dä Tarafdar bulıp tora. İnde şuşı ike tarafdar arasında bäreleş başlansa, bu - suğış eçendä suğışqa kiteregä mömkin. Ul arada dönyanıñ törle illärendä Ğiraq suğışına qarşı demonstartsiälär ütä.

Ali Gilmi, Praga
XS
SM
MD
LG