Accessibility links

дүшәмбе, 5 декабрь 2016, Казан вакыты 13:37

Düşämbegä qarşı töndä häm bügen irtän AQŞ xärbi oçqıçları Ğiraq şähärlären bombalawlarnı däwam itte.


Bağdad üzägendä bik köçle şartlawlar buldı. Royter xäbärçese Samia Nakhoul başqalada bu şartlawlar suğış başlanğannan birle iñ köçle şartlawlar buldı dide.

Azatlıq Radiosınıñ xäzerge waqıtta Ğiraqtağı xäbärçese Ron Synovitz AQŞ xärbiläre Basra-Bağdad yulı yanında urnaşqan Ğiraq pozitsiälären minaatqıçtan utqa tottı dip xäbär itä.

Uzğan töndä Ğiraq tışqı eşlär ministrı Naji Sabri AQŞ häm Britaniäneñ Säddam sarayların qatı bomba utına totuına qaramastan, Säddam saw-sälamät dip belderde. Düşämbedä Qahirädä Ğäräp illäre tışqı eşlär ministrları oçraşuı aldınnan Sabri jurnalistlar aldına çığıp Säddam Xösäyenneñ xäle bik äybät, ul xalqıbıznı häm bu kolonial’ agressiägä qarşı köräşebezne citäkli dide. Sabri Bağdadta İzrail’neñ şartlamağan raketası tabıldı dip İzrail’ne bu suğışta qatnaşuda ğäyepläde.

Suğışnıñ başındaraq zur qarşılıqlarsız häm az yuğaltular belän çağıştırmaça tiz xäräkät itkän koalitsiä köçläre üzlären Bağdad yanında närsä kötäçägen yäkşämbe könne tatıp qaradı dip äytergä mömkin. Çönki başqalanı Säddamnıñ iñ yaxşı ğäskärläre saqlıy. AQŞ armiäseneñ yuğaltuları turındağı xäbärne yäkşämbe kiçendä AQŞ köçläreneñ Qatardağı idaräsendä general-leytenant John Abizaid ta rasladı. Anıñ äytüençä, Nassiria şähäre yanında 12 AQŞ soldatı yuğalğan, distägä yaqını hälak bulğan. Yaralanuçılar da bar. Yäkşämbedäge bäreleşlär turında Abizaid “bu bezneñ iñ qatı qarşılıq kürgän könebez, alda da awır könnär bulırğa mömkin, ämma barıber da näticäse inde ışanıçlı räweştä mäğlüm” dide. Yäkşämbe irtäsendä Britan xärbi citäkçelege Ğiraqnıñ könyağında Ğiraq höcümennän soñ 2 britan soldatı yuğaldı dip belderde.

Ul arada AQŞ ğäskärläreneñ Ğiraqta ximiä zavodı dip uylanılğan ber urınnı tabuı turında xäbärlär kilde. Pentagondağı çığanaqlar bu zavodnıñ Bağdadtan 160-lap çaqrımdağı Nacaf şähäre yanında tabıluın belderä. Xäzer bu zavodnıñ ximik qoral citeşterügä qatnaşı bulu mömkinlege öyränelä. Kiçä kiç AQŞ üzäk idaräse ğäskärlär bezne qızıqsındırğan urınnarnı tikşerä dip kenä beldergän ide. Bu belderüdä älege urınnı ximik qoral yasaw zavodı dip atawçı xäbärlär artıq aşığu dip bäyälände. General Leytenant John Abizaid bu xäbärlär turında belderü yasawdan tıyılıp qalsa da “bez Ğiraqnıñ ike generalın äsirlekkä aldıq häm alar bezgä mäğlümät birä” dide.

BMO qoral tikşerüçelär citäkçese Hans Blixnıñ süzçese Ewen Buchanan BMO qoral tikşerüçelärenä Najaf yanında ximik qorallar citeşterergä mömkin nindi dä bulsa zur ximik qorılmalar buluı turında mäğlüm tügel dide.

Küwäyt xärbiläre bügen küwäytneñ tönyağında patriot raketası Ğiraqtan Küwäytkä atılğan raketanı bärep töşerde dip belderde

AQŞ xärbiläre Ğiraqta tönyaq frontnı nığıtuları turında äytä General Leytenant John Abizaid, bez tönyaqtağı köçlärne nığıtabız dip raslasa da, täfsilleräk mäğlümät birmäde. Ğiraqnıñ tönyağında yäşäwçe kördlärneñ citäkçelärennän berse, üz isemen atamaw şartı belän, Associated Press agentlığına Söläymäniä şähärennän 16 çaqrımlap könbatışqa AQŞnıñ 4 oçqıçı küp kenä xärbilär kiterde dide.

Atna axırındağı qatı bäreleşlär, Ğiraq köçläreneñ qarşılığı häm koalitsiäneñ yuğaltuları turındağı xäbärlär düşämbe irtäsendä dönya finans bazarlarında AQŞ dollarına salqın su sipkändäy tä’sir itte. Comğa könne kütärelgän dollarnıñ bäyäse bügen irtän yañadan töşte. Şul uq waqıtta uzğan atnada töşkän neft’ bäyäläre kiresençä kütärelde.

Naif Aqmal, Praga.
XS
SM
MD
LG