Accessibility links

сишәмбе, 6 декабрь 2016, Казан вакыты 08:47

Qazan mäktäbendä Bötenrusiä uqıtuçılar cıyılışı ütte…


Şimbä könne Qazanda bik xikmätle pedsovet buldı. Här mäktäptä bula ul, pedagogiä şurası utırışı. Uqıtuçılar bülmäsendä cıyılalar da, direktor citäkçelegendä cıyılış alıp baralar. Qazannıñ “Оргсинтез” yağındağı çitendä, Şaturskaya uramında 62nçe mäktäpkä şimbä könne irtänge säğät 10da bik küp keşelär, maşinalar cıyıldı. Bu nixäl, dip sorağaç, şuşı mäktäpkä xäzer Şäymiyıv kilä axrı, dip cawap birdelär. Tiz genä maşinanı ber tıqrıqqa quyıp, mäktäp qapqasına çaptım. Çınnan da, işek töbendä çäçäklär häm çäk-çäklär totqan qızlar kürenä. Alar citdi qiäfätle öç ağayğa nindider täbrik süzläre äytep, räxim itegez, dip mäktäpkä kerergä çaqırdılar. Äybätläbräk qarasam, alarnıñ öçese dä mıyıqlı häm küzlekle: Rusiä Däwlät Dumasında fraksiä citäkçese Oleg Morozov, Duma deputatı Nail Xösnetdinov, energetika institutı rektorı, “Berdäm Rusiä” firqäseneñ Tatarstan bülege citäkçese Yuri Näcmiev. Alar yanında tağın ike qunaq ta bar ikän. İkese dä mıyıqsız. Berse Rusiäneñ mäğärif ministrınıñ berençe urınbasarı Viktor Bolotov häm Tatarstannıñ mäğärif ministrı Faris Xarisov. İñ däräcäle häm qäderle qunaq – prezident apparatı citäkçese Ägzam Göbäydullin bulıp çıqtı.

Mäktäpneñ tar ğına koridorına kergäç, tatar, çuwaş, rus milli kiemnär kigän uquçılar arasında qalasıñ. Bu bala-çağa tatarça da, rusça da, başqa tellärdä dä cırlap, biep toralar. Tatarça cır bolay tanış işetelä, bezneñ zaman pionerları anı “Bez yäşibez Sovet cirendä” dip cırlıy torğan idelär. Min qolaqnı torğızıp tıñlağaç, qänäğät qaldım. Bu balalar “Bez yäşibez tatar cirendä” dip cırladı.

Audio

XS
SM
MD
LG