Accessibility links

пәнҗешәмбе, 8 декабрь 2016, Казан вакыты 15:04

…“Единая Россия” saylawlarğa äzerlänä


Ämma-läkin şuşı “Tatar cirendä yäşibez” digän süzlärne “Единая Россия” firqäse wäkilläre añlağan bulsa, täki älege süzlärne tözättergän bulırlar ide. Çönki yedinoroslar Tatarstan möstäqillegenä, latin älifbasına qarağan mäsälälär tikşergändä, millätlärgä häm milli respublikalarğa qapma-qarşı pozitsiädä torıp, berdäm qarşı tawış birälär. Bu könne 62nçe mäktäptä böten Rusiä uqıtuçılar cıyılışın ütkärüçelär dä şuşı “Единая Россия” firqäseneñ Tatarstan bülekçäse wäkilläre ikän. Mondıy cıyılıştan çittä qalıp bulmıy. Ni äyterlär ikän, millätlärgä, tuğan tellärgä mönäsäbät niçek bulırğa tiyış dip mäktäpneñ şaqtıy zur sportzalına kerdek. Ul arada Oleg Morozov Pedsovetnı, döresräge, “Berdäm Rusiä”neñ maxsus cıyılışın başlap ta cibärde. Anıñ äytüençä, cıyılışqa Rusiäneñ 30lap töbägennän uqıtuçılar çaqırılğan. Morozov häm Mäskäwdän kilgän Bolotov açıqtan-açıq uqıtuçılarnıñ töp bäläsen äyttelär. Eş xaqlarınıñ tübän buluı häm küp kenä mäktäplärdä uzğan yılnıñ noyäberennän birle eş xaqları tülänmäw. “Единая Россия” digän firqä xökümätkä qatı süzlär äytep, şuşı eş xaqların tülätterergä alına ikän. Soñraq, beraz bayıp kitkäç, uqıtuçılarnıñ eş xaqların arttıru mäsäläse dä qaralaçaq ikän. Şulay bulğaç, “Единая Россия” xalıqnıñ häm iñ berençe çiratta, uqıtuçılarnıñ nujaların belep, aların yaqlıy torğan firqä bulıp çığa. Saylawlar citkäç, uqıtuçılar bu märxämätlekne onıtmas. Tatarstanda ğına da mäğärif xezmätkärlärneñ sanı 80-90 meñ çaması. Ä uquçılar sanı yartı millionnan artıq. Alar barısı da «Berdäm Rusiä»gä kermäsä dä, cilneñ qayan iskänen, kemne yaqlarğa kiräklegen aldan belep torır. 62nçe mäktäpne ni öçen saylağannar disägez, ul iñ ğadi, urtaça Rusiä mäktäbe ikän. Binası ör yaña tügel, bay cihazlar da kürenmi. Şulay da tärtip bar, 1.5 meñ bala uqıy anda. Pedsovetqa kilüçelär, yäğni Rusiädän häm Mäskäwdän kilgän qunaqlar klasslarğa bülenep, açıq däreslärdä qatnaştılar. Tatarstannıñ mäğärif ministrlığı häm Qazan şähäreneñ Aviatözeleş rayonı mäğärif bülege bu çaranı ütkärügä zur köç salğan häm küñelle, şul uq waqıtta citdi meropriätie kilep çıqqan.

Uqıtuçı Nina Xakimova rus tele däresendä uquçılar itep, parta artına älege ministrlarnı häm prezident wäkillären utırtıp, alarğa “ребята” dip möräcäğät itte häm ğibrätle genä däres birde. Citäkçelär däresne añlağannardır. İñ töp däres şul: “Единая Россия”neñ Tatarstan bülege yoqıdan uyanırğa cıyına. Şuşı firqäneñ V.Volodin citäkçelegendäge tağın ber törkeme Penza ölkäseneñ ber awılına barıp, sıyırlar bäylängän ferma binasın qaradılar, mögezbikälärne sıpırdılar, sıyır sawuçılar belän söyläştelär. Awıl xezmätkärläre nindi partiäneñ xakimiät başında bulaçağın häm eş xaqların kemnär aşa tülätterü mömkinlegen onıtmas. Qazandağı Pedsovetta qatnaşuçılar Rusiä xökümätenä zur häm bik citdi möräcäğät qabul ittelär. Mäktäpne, uqıtuçılarnı qäderlärgä, kiläçäk turında uylarğa täqdim itelä bu möräcäğättä. Turıdan-turı Kremlgä çaqırıp sügäse urınğa xalıq arasınnan, partiä awızınnan işetterelgän taläp ütemleräk bulır, dip uylarğa qala.

Mondıy populyar ğämällärne televizor aşa kürgäç, başqa firqälärneñ säyäsi texnologlarınıñ yöräkläre çänçep quyğandır. Alar könçeleklärennän nişlärgä belmägännärder. Saylawçılar küñele öçen köräş ciñel bulmayaçaq.

XS
SM
MD
LG