Accessibility links

шимбә, 10 декабрь 2016, Казан вакыты 10:02

Bağdadnıñ könyağında Ğiraq respublikan gvardiäse belän AQŞ citäkçelegendäge koalitsiä köçläre arasında bäreleşlär bara


Bügen Amerika Quşma Ştatları citäkçelegendäge xärbi hawa köçläre Bağdadnı utqa tottı, Nassiriya häm Basra şähärläre tiräsendä cir öste ğaskärläre suğışnı däwam itä. Könyaqta Quşma Ştatları xärbi diñgezçeläre-marinnar, Yefrat yılğası aşa üzlärenä Nassiriyağa yul sala.

Jurnalistlar, Nassiriya tiräsendä kimendä 30 Ğiraqlı häläk bulğan dip belderde. Ğiraq xärbi köçläreneñ matbuğat wäkile Hazem Al-Rawi, Faw yarım utrawında berençe intixar terror ğamäle buldı, dip xäbär itte. Ber Ğiraqlı üz üzen häm tanknı şartlatqan. Ğiraq mäğlümat ministrı Mohammäd Said Al-Sahaf, Nassiriya häm Basra yanında 8 amerikan häm britan xärbie häläk buldı, koalitsiäneñ xärbi cihazları saftan çığarıldı, dip belderde. Uzğan töndä Bağdadta 16 keşe hälä bulğan häm 95e yaralanğan dip xäbär itelde. Könyaqtağı qom burannarı elemtägä häm xärbi çaralarğa ziyan kiterä.

Tanklar häm qorallanğan köçlär Bağdadqa taba yulnı däwam itär öçen ike möhim küperne üz kontrolenä aldı. Britan ğaskärläre Basra yaqınnarında Kuwait çigennän 60lap çaqrım yıraqlıqta Ğiraq köçläre belän suğış alıp bara. Ğaräp Al-Jazeera televideniäse koalitsiä köçläre Basra şähärenä uzğan töndä çäçelüçän bombalar attı, dip xäbär itte. Ğiraqnıñ ikençe zur şähärendä aş-su häm elektr qıtlığı bar. Xalıqara oyışmalar şähärdä humanitar krizis başlana dip çañ qağa. Britan ğaskärläre Ğiraqnıñ berdän ber portı bulğan Umm Qasr şähären “açıq häm imin” dip iğlan itte. 48 säğat eçendä biregä humanitar yardäm kilep citergä tieş dip xäbär itelä.

Amerikan prezidentı George Bush Quşma Ştatları kongressınnnan Ğiraq suğışın finanslawğa östämä 74 milliard 700 million dollarlıq yardäm soradı.

Britaniä premyer-ministrı Tony Blair, Ğiraqta suğış äle däwam itäçäk, häm ul bik küp köç taläp itä, läkin Amerika Quşma Ştatları citäkçelegendäge koalitsiä barıber Ğiraq prezidentın urnınan alaçaq, dip belderde. Koalitsiäneñ maqsatı elekkegeçä, Säddäm xakimiäten bärep töşerü häm Ğiraqnı qoralsızlandıru qala, dide. Britan-Amerikan ğaskärläre Bağdad yanındağı Karbalağa kilep citte, anda Ğiraq respublikan gvardiäseneñ Medina diviziäse belän bäreleşlär bara. Blair süzlärenä qarağanda, Ğiraq köçläreneñ qarşı toruı aptıraş tudırmıy, dip belderde.

İrtägä Britaniä premyer-ministrı Quşma Ştatalrğa Amerikan prezidentı George Bush belän oçraşır öçen kitä. Söyläşülärneñ köntärtibendä şulay uq Ğiraq suğışı tämamlanğaç Quşma Ştatları belän Yevropa arasındağı mönäsäbätlärne caylaw mäs’äläse dä toraçaq, dide Blair. Şulay uq Blair Berläşkä Millätlär Oyışması General Sekretare Kofi Annan belän oçraşıp söyläşäçäk.

XS
SM
MD
LG