Accessibility links

сишәмбе, 6 декабрь 2016, Казан вакыты 21:06

Tatarstan Çeçen Respublikası belän yaña mönäsäbätlär urnaştıra


Tatarstan cämäğätçelege Çeçen Respublikasındağı referendum barışın berdä arttırmıyça, zur qızıqsınu belän küzätte, dip äytergä bula. Mäğlüm ki, Mintimer Şäymiev Çeçnyağa mömkin qädär möstäqillek, mömkin qädär avtonomiä birüne xuplap çıqtı. İçkeriägä konstitutsiäle, prezidentlı däwlät statusı birgän referendumnıñ tabadan töşkänen kötep torğanday, Tatarstan xökümäte düşämbe könne Çeçen Respublikası administratsiäse belän säwdä-iqtisadi, fänni-texnik häm mädäni xezmättäşlek turında kileşü imzaladı. Älege kileşügä Çeçnya yağınnan Äxmät Qadırov, Tatarstan yağınnan premyer-ministr Röstäm Miñnexanov imza saldılar. Älege kileşüdä yaqlarnıñ Çeçen Respublikası iqtisadın tergezüne tizlätüdä häm elekkege ozaq möddätle iqtisadi bağlanışlarnı tergezüdä mänfäğätläre buluı raslana. Xäzerge waqıtta Tatarstannıñ säwdä häm tışqı iqtisadi xezmättäşlek ministrlığı häm Çeçen Respublikalınıñ Tatarstandağı wäkilçelege belän älege kileşüne tormışqa aşıru öçen berketmä äzerläw bara. Tatarstanda küpçelek xalıq Çeçnya problemasın tınıç, säyäsi yullar belän çişü yağında:

Audio

Läkin Çeçnya referendumın xuplawçılar arasında, forsattan faydalanıp, federal' üzäkneñ möstäqil däwlät statusı alırğa telägän töbäklärgä, respublikalarğa qarata säyäsäten tänqitläwçelär häm referendum näticälärenä berniqädär skeptik qaraşta toruçılar da bar. Näq menä referendumnıñ berençe näticälären iğlan itä başlağan könne, düşämbe könne Tatarstan militsionerlarınıñ berläşterelgän 150 keşelek törkeme Gudermesqa kitte. Älege törkemne bu yulı eçke eşlär ministrı urınbasarı Rafil Nogomanov citäkli. Vokzalda mäğlümat çaralarına intervyu birgändä, ul referendum ütkärü belän genä Çeçnyada mıltığın atıp bärüçelär bik işäymäs äle, digän fiker äytte.

XS
SM
MD
LG