Accessibility links

шимбә, 10 декабрь 2016, Казан вакыты 23:47

Baqır babay häykäle qayda da, Qol Ğäli babay häykäle qayda?


Menä niçä yıl inde Tatarstanda ataqlı şäxeslärgä häykällär quyu turında süzlär yörsä dä, mondıy eşlär haman kiçekterelep bardı. 1992 yılnıñ yünendä Qazan mädäni-milli üzäge qarşında Mirsäet Soltan-Galievqa bulaçaq häykälgä taş salınğan ide. Älegä qädär dä milli azatlıq xäräkäteneñ yulbaşçısı bularaq tanılğan bu şäxeskä haman häykäl quyılmadı. Bu mäydançıqta elekke Pionerlar yortı tözekländerelep, finans ministrlığına äwerelde. Fontannar, märmär basqıçlar quyıldı. Tarixi şäxeslärne onıtu yaramağanın härkem belä. Bügenge köngä qädär Märcänigä, Riza Fäxretdinğa, Kärim Tinçurinğa, Hadi Taqtaşqa häm başqa xörmätle zatlarğa häykäl quyılmağan. Säydäşkä, şulay uq Qazannı saqlawçılarğa häykäl quyu bik ozaqqa suzıldı. Qazannıñ 1000-yıllığına äzerlek, tarixi şäxeslärne mäñgeläşterügä yaña taläplär quya.

Sişämbe könne Qazanda kiñ cämäğätçelekkä iğlan itelmiçä genä ber kiñäşmä ütkärelgän. Respublika prezidentı Mintimer Şäymiev, ğalimnär, sängätqärlär qatnaşqan bu cıyılışta tarixi şäxeslärgä quyılaçaq häykällärneñ ürnäkläre häm alar quyıla torğan urınnar tikşerelgän. Räsmi bulmağan mäğlümatlarğa qarağanda, tatar ädäbiätenä nigez saluçı Qol Ğäligä häykäl Qaban buyında, Qazannıñ 1000 yıllığı isemendäge yaña tözeläçäk parkta quyılu variantı uñay bäyä alğan. Basket-xoll häm “Tatenergo”nıñ yaña binası arasında urnaşqan mäydan yaqın arada Qazannıñ iñ matur urınnarına äylänäçäk.

Rusiä häm Qazan tarixında mäşhür Gavrila Derjavinnıñ häykäle 30-nçı yıllarda patşa zamannarın iskä töşerä dip, cimerelgän, ä xalıq äytkänçä, Baqır babay sını eretelep sänäğät maqsatlarında qullanğan. XİX ğasırda kuelqan bu häykälne äle dä onıtmıylar. Sişämbe könne bulğan kiñäşmädä Gavrila Derjavinnıñ häykäle Lyadskiy sad dip atalğan baqçada, Akterlar yortı häm Tatarstan filarmoniäse artında quyılu döresräk bulır digän fikergä kilgännär. Derjavin häykäleneñ elekke urınında xäzer İrek mäydanı, opera häm balet teatrı, Zur konsertlar zalı binaları. Mäydannıñ ber yağında ratuşa tözelä, ikençe öleşendä xökümät binası sütelep, yañadan ayaqqa bastırıla. Lenin häykäle älegä üz urınında tora, anıñ yazmışın kiläse buın tarixçıları häm sängätqärläre şulay uq, älbättä, däwlät başlıqları xäl itär. Şulay itep, beryulı ike häykäl - Qol Ğali häm Derjavin häykällären Qazanğa häm şähär qunaqlarına kürsätü köne yaqınlaşa.

XS
SM
MD
LG