Berezovskiy hәm Dubovnıŋ vaqıtlıça qulğa alınuları.

Russiә xakimiәtlәreneŋ 94-nçe yılnıŋ noyәberennәn alıp 95-nçe yılnıŋ iyül ayına qәdәre bulğan çorda aldaşuda ğәyeplәgәn Berezovskiy belәn Dubov Londonda qulğa alındılar. Lәkin, alar 160 meŋ dollar fidyә-zalog salğannan soŋ ildәn kitmәv hәm 2-nçe Aprildә mәxkәmәgә kilü şartı belәn irekkә çığarıldılar. Russiә xakimiәtlәre әytep kitelgәn vaqıtta Berezovskiy belәn Dubov, Logovaz aftomobil sәvdә şirkәteneŋ direktorları bulğanda, Samara administratsiәsen 60 miliard rubel aldauda ğәyeplilәr. Alardan tış Badri Patarkatsişvili dә ğәyeplәnә. Ul xәzer Gruziәdә yәşi hәm xakimiәtlәr anı Russigә tapşırunı planlamağan buluların belderәlәr. Üz vaqıtında Yeltsinneŋ yaŋadan prezident itep saylanuında rol uynağan, şulay uq başta Purinne dә yaqlağan Berezovksiy, soŋğaraq aŋa qarşı pozitsiә aldı hәm vaqıt ütü belәn üzenә qarşı basım arta baruın hәm qulğa alınu qurqınıçınıŋ buluın kürep Russiәdәn kitәrgә mәcbür qaldı. Ul soŋğı ike yılda Londonda yәşi. Berezovskiy Russiә xakimiәtlәreneŋ ekstradiksiә talәbe politik hәm Dikәber ayında bulaçaq Duma saylauları belәn bәylәneşle dip belderde. Küzәtüçelәr qulğa alunıŋ sәyәsәt belәn bәyle buluın qabul itәlәr. Tik alarıŋ monıŋ eçkeme, әllә tışqımı sәyәsәt belәn bәyle buluı mәsәlәsendә fikerlәre ayırıla. Miras Fondınnan Yevgeniy Volknıŋ fikerençә, Berezovskiynıŋ qulğa alınuı Ğıraq suğışı belәn bәylәngәn, Britaniә belәn Rusisә arasındağı mөnәsәbәtlәr kiskennәşә tәşkәndә, Londonnıŋ Mәskәvgә duslarça işarә cibәrü bulıp tora. Annan başqa Britaniәdә Berezovskiyğa sempatiә belәn qarıylar dip әytep bulmıy. Volknıŋ Moskov Times gazetasında basılıp çıqqan sitatına qarağanda, Berezovskiy Russiәgә tapşırılır dip kөtep bulmıy. Lәkin, saylaulardan alda anı qurqıtu bulıp tora. Şulay itep Duma saylaularınan alda fondlarınnan faydalana almauına kiterә ala. Kreml belәn elemtәse bulğan politik küzәtüçe Sergey Markov ta Berezevskiy Russiәgә tapşırılır dip kөtmi hәm berük vaqıtta anıŋ qulğa alınuı Putingә üzenә kürә bülәk bulıp tora digәn fikerdә. Bәysez küzәtüçe Andrey Piontkovskiynıŋ fikereçә, Russiә xakimiәtlәre üz vaqıtında Kremldә xakimiәtne qulda totqan hәm soŋğaraq Putingә opppozitsiәgә küçkәn oligarxlarnı qulğa elәkterü mәsәlәsendә qıuraq xәrәkәt itә başladılar. Lәkin, oligarxlar küpkenә yәşeren mәğlümәtlәrgә iәlәr, alar monı faş itkәn xәldә, әle dә yuğarı urın bilgelәgәn rәsmilәrneŋ dә qanunsız eşçәnlege faş iteler ide. Şul sәbәple, Berezovskiynı ekstradiksiәlәv, anıŋ soŋğı yılardağı eşçәnlege өçen tügel, ә 90-nçe yıllarnıŋ urtalarındağı aktivlığı өçen talәp itelә. Lәkin, bu qısqa vaqıtta xәl itelerlek mәsәlә tügel. Mәskәmәneŋ aylarğa suzıluı mөmkin. Berezovskiynıŋ xөkem protsesın Kreml xakimiәtlәrenә hөcüm itü өçen faydalanaçağına şik bula almıy. Şul sәbәple Russiә xakimiәtlәre eşçәnlegeneŋ Berezovskiynı endәştermәvgә tügel, ә kiresençә, anıŋ tauışınıŋ işetelüenә kiterüe ixtimal. Ferit Idelle, Praga .