Accessibility links

пәнҗешәмбе, 8 декабрь 2016, Казан вакыты 13:02

Rusiädä milli säyäsätne üzgärter çaq citte


Rusiä ministrı Vladimir Zorin Tatarstan Prezidentı Mintimer Şäymievqa Rusiä milli säyäsäte kontsepsiäsenä üzgäreşlär häm östämälär kertüne täqdim itkän. Mintimer Şäymiev, üz çiratında, bu eşne Fännär Akademiäsenä, Däwlät Şurasına, xökümätkä quşa. Çärşämbe könne, Däwlät Şurasınıñ milli mäsälälär, mäğärif, mädäniät komissiäseneñ utırışında da, bu milli säyäsät kontsepsiäsenä üzgäreşlär kertü mäsäläse qaraldı. Xäzer, böten oyışmalardan kertelgän täqdimnärne bergä tuplaw eşe bara ikän. 28 martta Mintimer Şäymiev alarnı Mäskäwgä alıp barıp, ministr Zorinğa tapşırırğa tieş.

Milli säyäsät kontsepsiäse 1999 yılda uq qabul itelgän bulğan. Däwlät Şurası komissiäse räise Razil Wäliev anı «Üz zamanı öçen şaqtıy äybät eşlängän dokument ide» dip bäyäläde. Nindi genä äybät dokument bulmasın, şul uq Razil Wäliev äytkänçä, aña da Rusiädäge qanunnarnı ütämäw bäläse qağılğan. İkençe yaqtan qarağanda, konsepsiä böten millätlärneñ mänfäğätlären ber tigez däräcädä qayğırtmıy. Bilgele inde, urıs xalqına östenlek birelä.

Bu kontsepsiä östendä eşneñ başı Rusiä Prezidentı Vladimir Putinnıñ III Bötendönya tatar kongressı delegatları belän oçraşuına kilep totaşa. Şuşı tarixi waqiğadan soñ tuğan «Prezident yöklämäläre» digän dokumentta da milli kontsepsiä kebek serle süzlär äytelgän ide.

Anan soñ, 1999 yıldan birle şaqtıy waqıt uzğan, tormış ta üzgärgän, Prezident ta alışınğan, yäğni bu dokumentqa tözätmälär kerter waqıt citte.

Tatarstan xakimiätläre, üz çiratında, monıñ belän faydalanıp qalırğa tırışa, tirän uylanılğan täqdimnär äzerli. Menä mäsälän Däwlät Şurasında komissiä räise Razil Wäliev fikerençä, şuşı kontsepsie nigezendä milli säyäsät qanunı qabul itelergä, millätlär palatası buldırılırğa, milli avtonomiälärneñ statusı kütärelergä tieş. Häm iñ möhime, här millätkä tigez xoquq birelsen ide, di ul.

Däwlät Şurasınnan qala, kontsepsiä östendä, Fännär Akademiäse häm xökümät tä eşli. Mäsälän, ber dokumentta milli kontsepsiä digändä, cäyälär eçendä, etnik yäki etno-mädäni töşençälären kertü dä täqdim itelä. İkençe ber proyektta, çittä yäşäwçe millättäşlärneñ tarixi Watannarı belän elemtädä toru häm tuğan teldä yuğarı belem alu mömkinlegen tudıru kebek mäsälälär kütärelä. Äytkänemçä, şuşı könnärdä täqdimnärne berläşterü eşe bara, ä 28 martta qädär şuşı dokumentnı Prezident Mintimer Şäymiev ta qarap çığarğa tieş.

XS
SM
MD
LG