Accessibility links

пәнҗешәмбе, 8 декабрь 2016, Казан вакыты 06:59

Qazan universitetı Tatarstan xökümätennän açqa sorıy


Pänceşämbe könne Qazanda prezident rezidentsiäsendä Qazan universitetınıñ 200-yıllığına äzerlek mäsäläsenä bağışlanğan kiñäşmä ütte. Älege kiñäşmädä dä Mintimer Şäymiev qatnaştı. Monnan ike yıl elek Rusiä Federatsiäse xökümäte Qazannıñ 1000-yıllığına äzerlek programmasın raslağan ide. Älege programma qısalarında Qazan universitetınıñ 200-yıllığına äzerlek çaraları da qaralğan häm oyıştıru komitetı buldırılğan. Oyıştıru komitetı universitetnı üzgärtep qoru, tözätü programmasın äzerläde. Älege programmada 2005 yılğa qädär universitetnıñ töp binasın tözätü, rekonstruksiäläü, anıñ Könçığış qanatın tözü qaralğan.

Bügenge kiñäşmädä ber yıldan artıq qalğan waqıt eçendä nindi tözekländerü eşläre alıp baru häm fänni uqıtu protsessnı zamançalaştıru turında süz bardı. Töp çığışnı yasağan universitet rektorı Mägsum Saläxov, şähär administratsiäse başlığı Kamil İsxakov, häm başqalar Qazan universitetınıñ niqädär ähämiätle, danlı uqu yortı, Rusiä häm Tatarstan tarixınıñ iñ istälekle bitlären kürsätüçe belem uçağı ikänen äyttelär. Şul uq waqıtta universitet küz aldında cimerelep, taralıp bara ikän. Cimerelä barğan binalarnı tergezü öçen bik küp aqçalar kiräk. Rusiä ministrlığı qaramağında bulğan bu uqu yortı Qazannıñ 1000-yıllığı programmasına kertelgän bulsa da, Mäskäwdän aqçanı bik tamızmıylar. Prezident universitetnıñ geologiä fakultetına “Tatneft'” berläşmäse yärdäm itä almasmı, digän täqdimne kertte. Eş matdi çığımnar häm binalarnı tözekländerüdä tügel, älbättä. Mägsum Saläxov universitet belän respublika oyışmaları arasındağı elemtälärneñ zäğif buluın atap kitte. Xäzer uqu-uqıtu häm fänni eşçänlekne yañaça qorırğa kiräk. Mintimer Şäymiev bu süzne qüätläp, Tatarstandağı fänni oyışmalarnıñ üzara elemtäläre citmäwgä iğtibar itte.

XS
SM
MD
LG