Accessibility links

җомга, 9 декабрь 2016, Казан вакыты 01:06

Uzıp kitkän kön Ğiraq suğışında ğädäti ber kön buldı diärgä mömkin


Koalitsiä oçqıçları Bağdadnı häm Ğiraq xärbiläreneñ pozitsiälären bombalawnı däwam itte, Ğiraq citäkçelege, ğädättägeçä, kisken belderülär yasadı. Badğadtağı hawa höcümnärendä töp iğtibar mäğlümät ministrlığına, prezident Säddam Xösäin sarayına birelde. Bügenge bombalawlar näticäsendä Ğiraq televideniese tağın ber märtäbä berniçä säğätkä tuqtap tordı. Ğiraq xakimiätläre bu bombalawlardan 4 keşe hälak buldı dip belderä.

Başqalanıñ könyağında AQŞ citäkçelegendäge köçlär berniçä märtäbä Ğiraqnıñ yarımxärbi köçläre häm Cömhüriät Saqçıları belän bäreleşte. Anda ber amerikan xärbie hälak buldı. Şul uq waqıtta AQŞ xärbiläre distälärçä Ğiraq xärbieneñ üterelüe yäki qulğa alınuı turında belderä. Ğiraqnıñ mäğlümät ministrı Möxämmät Säit äs-Sahaf isä uzğan täwlekyarım waqıt eçendä Ğiraq köçläre AQŞ häm Britaniäneñ 43 soldatın üterde dip belderde. Anıñ äytüençä, ğiraqlılar 4 apaçi boralağın bärep töşergän, koalitsiäneñ 13 tankın cimergän. Ämma bu sannarnı bäysez çığanaqlar aşa raslaw mömkin tügel.

Bügenge iñ zur bäreleşlärneñ berse Kerbaladan könçığıştaraq urnaşqan Hindiya şähäre yanında buldı. Bu urın xäzer front sızığınıñ Bağdadqa iñ yaqın öleşe. Biredä AQŞ xärbiläre Ğifrat yılğası aşa salınğan küperne yawlap alırğa tırışa.

Tağın da könçığıştaraq Şatra şähärendä AQŞ xärbiläre Ximik Ali quşamatlı keşene ezläw belän mäşğül buldı. Anıñ çın iseme Ali Xäsän Äl-Mäcit. Ul 1988-nçe yılda Kördlärgä qarşı ağulı gaz qullanuda citäkçelek itkän.

Koalitsiäneñ zur yawlawları turında xäbärlär bügen bulmadı. Şulay da, AQŞ xärbiläre Nasiriä şähäre yanında küp sanda xärbi qorallar, häm ximik dizinfeksiä cihazı tabıluı turında belderde. Bügen Qatarda AQŞ Generalı Vincent Brook bolay dip çığış yasadı:

AUDİO: Nasiriäneñ könyaq-könbatışında Talil hawa alanı yanında zur qoral tuplanması qulğa alındı. Alar 40-lap binada urnaşqan. Anda suğış kiräk yaraqları, ximik dizinfeksiäläw cihazı, şul isäptän Samara dizinfeksiäläw maşinası, ximik saqlanu kiemnäre häm bilgesez artilleriä tupları bar.

Brook, şulay uq, Ğiraqlılar koalitsiä köçlärenä mäğlümät belän yardäm itä dide.

Ämma Ğiraq tışqı eşlär ministrı Naci Sabri Amerikalılar häm Britaniälelär Ğiraqnı bülgäläp buysındıra alaçaqları turında uylap yalğışalar dide. Sabri Amerikan häm Britan soldatları öçen Ğiraq qäberlekkä äwereläçäk dide. Koalitsiäneñ bu azat itü suğışı digän belderülären kire qağıp Ğiraq tışqı eşlär ministrı alarnı kolonialistlar dip atadı:

AUDİO: İngliz-Amerikan kolonialistları häm suğış çuqmarları Ğiraqqa närsä teläwläre turında yalğışalar. Kolonialistlar bularaq alar Ğiraqnıñ bülgälängän buluın, berdäm bulmawın telilär. Bu - alarnıñ teläkläre.

Sabri äytüençä, AQŞ citäkçegendäge köçlärgä qarşı suğışu öçen Ğiraqqa törle ğäräp illärennän 5 meñnän artıq ğäräp ixtiarıyı kilgän. Kiçä Ğiraq generalı Häzim är-Rawi 4 meñläp ixtiarıy atna axırında üze belän bomba şartlatıp 4 amerikan soldatın ütergän intixarçınıñ ğämälen qabatlarğa äzer digän ide. Bügen Bäyrüttän avtobusqa utırıp Ğiraqqa 36 ixtiarıy kitte. Alarnıñ qayberläre intixar höcümnäre oyıştırırğa teläwlären belderde. Ämma bügen Britaniä saqlanu ministrı Geoff Hoon bu ğämälne faydasız xärbi taktika dip atadı. Anıñ äytüençä, mondıy höcümnär suğışqa ällä ni tä’sir itä almayaçaq. Ğiraqnıñ könyağında Britan köçläre başqaladan qala ikençe zur şähär Basra tirälärenä höcümnärne däwam itte.

BMOnıñ Azıq-tölek oyışması Ğiraq xalqın tuyındıruda zur krizis bulmas dip ömetlänüen belderde. Oyışmanıñ başqarma mödire James Morris bezdä Ğiraq xalqınıñ ixtiacların qänäğätländererlek azıq-tölek bar dide.

Naif Aqmal, Azatlıq Radiosı, Praga
XS
SM
MD
LG