Accessibility links

сишәмбе, 6 декабрь 2016, Казан вакыты 21:01

Amerikan xärbiläre tuqtaw färmanına buysınmağan maşinağa ut açu näticäsendä 7 sivil keşe xäläk buldı


Sişämbe irtäsendä Ğiraq başqalası yänä utqa totıldı. Hawa xöcümnäre ğädättägeçä xökümät binaları häm prezident saraylarına yasaldı. Bagdadnıñ könyağı, Cömhüriät saqçıları urnaşqan urınnar, tönyaqtağı Mosul häm Kirkuk şähärläre şulay uq utqa totıldı. Düşämbedä Pentagon räsmiläre Ğiraq östenä qoyılğan bombalar sanın iğlan itte. Suğış başlanğannan birle 700 Tomahawk raketası häm 8 meñ tögäl bomba atılğan, şunıñ 3 meñe soñğı 3 köngä turı kilä. General-mayor Stanley McChrystal äyütençä, hawa xöcümnäre Saddamnıñ iñ tuğrı suğışçıları bulğan Respublikan gvardiäsenä zur zıyan kitergän. Bagdadnı saqlarğa äzerlängän bu köçlär xäzer saflarında üzgäreşlär başqara. Gvardiä suğışçıları belän Amerikan xärbiläre arasında berençe qulğa-qul bäreleş düşämbedä Bagdadtan 80 çaqırım yıraqlıqta urnaşqan Hindiä qalasında bardı. Bu şähärneñ Ğifrat aşa küpere strategik äxämiätkä iä. Koalitsiä köçläre şähärneñ ber öleşenä ütep kerä alğan, Baath partiäse fatirında zur külämdä qoral tabılğan.

Sişämbedä Qatarda urnaşqan idarä üzäge ber küñelsez xäl turında xäbär itte. Nacaf şähäre yanındağı tikşerü noqtasında ber maşina kisätülärgä qaramıyça baruwın däwam itkännän soñ, amerikan xärbiläre ut açqan. Maşinada 13 keşe: xatın-qızlar, balalar bulğan. Şularnıñ 7-se xüläk bulğan, ikese yaralanğan. Uzğan atnada näq şul urında maşinağa utırğan ber ğiraqlı üzen-üze şartlatıp 4 amerikan xärbien ütergän ide. Şul waqiğadan soñ yat maşinalar belän eş itüdä yaña qağidälär kertelde.

Ğiraqnıñ mäglümät ministrı Möxämmät Säet Äl-Sahaf koalitsiä köçlären sivil xalıqnı üterüdä ğäyepläde. Ğiraq mäglümätenä qarağanda suğış başlanğannan birle Ğiraqta 600-gä yaqın keşe xäläk bulğan, 4-meñ-yarımı yaralanğan. Xärbilär arasında yuğaltular bilgesez. Koalitsiä saflarında 46 amerikan, 25 britan xärbie xäläk bulğan, 17 amerikan xärbie xäbärsez yuğalğan sanala. Düçämbedä Ğiraq tışqı eşlär ministrı Naci Sabri Britan-Amerikan xärbiläre maqsatlarına ireşmiäçäk, Ğiraqta qäberlären tabaçaq dip kisätte:

Audio (Naci Sabri): Xökümätneñ xäräkät itü gädättägeçä, di Naci, aña ber zıyan da kilmäde. Agresssiä yıllar buyı barsa da, bez şulay däwam itergä tieş.

Düşämbedä Ğiraq televideniese Saddam Xösäin räiselegendä ütkän utırış räsemnären kürsätte. Anda anıñ ike ulı da qatnaştı. Räsemneñ qayçan töşerelgäne bilgesez. Düşämbedä Pentagonda ütkän matbugat oçraşuında Saqlanu ministrlığı süzçese Victoria Clarke Saddamnıñ häm anıñ ullarınıñ martnıñ 20sennän birle kürengännäre yuq, bezdä anıñ ğailä äğzaları ildän kitü yulların qarıy digän mäglümät bar dip äytte.

Düşämbedä Philadelphiägä kilgän Amerikan prezidentı George Buş, kampaniäneñ 12 köne eçendä bez küp närsägä ireştek, Ğiraqnıñ könbatışı häm könayğı tulısınça diärlek koalitsiä qulında, möxim küperlär alınğan, tönyaq front açılğan, hawada tulı öztenlek, tonnalar belän humanitar yärdäm kilä başladı dide. Berük waqıtta ul Amerikağa qarşı teror ğämälläre ixtimalın äytte, läkin bez alarnı tuqtataçaqbız, dide ul:

Audio (George Bush): Alda äle küp qurqınıçlar kötä, läkin bez kön artınnan kön Bagdadqa, ciñügä yaqınayabız.

Düşämbedä Berläşkän Millätlär oyışmasınıñ Qaçaqlar komitetı citäkçese Ruut Lubbers Ğiraqtan 600 meñ qaçaq kötelüwen rasladı. Älegä berniçä meñ genä kitte, läkin bu san arta baraçaq, qaçaqlar suğış başında tügel, ä krizisnıñ axırında, azıq-tölek, su betkäç, ildä eçke qarşılıqlar başlanğaç artaçaq, dide ul.

Ali Gilmi, Praga
XS
SM
MD
LG