Mintimer Şäymiev “Единая Россия” qorıltayı näticälärenä häm federal'' üzäkneñ Çeçnya belän şartnamä tözüenä qarata mönäsäbäten belderde

Uzğan yal könnärendä Tatarstan säyäsätçeläre Rusiädäge häm respublikadağı säyäsi waqiğalar üzägendä buldı. Ğädättägeçä, prezident Mintimer Şäymiev älege waqiğalarğa “İnterfax” agentlığına birgän äñgämäsendä bäyä birde, näticälär yasadı. “Единая Россия” firqäse qorıltayına näticälär yasağanda, Şäymiev “Rusiä säyäsi tormışında partiä waqıtı citte”, dide. Anıñ fikerençä, firqälär häm saylawlar turında yaña qanunnar qabul itkännän soñ ildä ber genä saylawlar da firqä isemleklärennän başqa ütmäyäçäk. Firqälär şulay uq bermandatlı okruglardan da üz mämzätlären täqdim itärgä xoquqlı. Şuña kürä, kem genä xakimiättä bulmasın, yä bulırğa telämäsen, telime-telämime, üzeneñ qaysı firqägä kerüen saylarğa tieş, dide Şäymiev. Ä inde “Единая Россия” kebek köçle firqä citäkçese bularaq, ul bu firqä xalıqnıñ küpçelege mänfäğätlärenä qağılğan mäs'älälärdä üz pozitsiäsen aktiv häm bäysez yaqlarğa tieş dip belderde.

Çeçnyada referendumnan soñ federal' üzäkneñ wäkälätlär büleşü turında şartnamä tözergä cıyınuına qarata Şäymiev “İnterfax” agentlığına birgän intervyuda mondıy şartnamä Çeçnya mäs’äläsen caylawğa säyäsi yunäleş birergä mömkinlek tudıraçaq, dide. Anıñ fikerençä, bu waqiğa ilneñ federativ asılın bötenläy onıtıp, Rusiäne unitar däwlät yulına qaytarırğa tırışqan säyäsi elitanıñ ber öleşe öçen sabaq bulaçaq. Şäymiev Çeçnyada amnistiä awır cinayät qılmağan Rusiä xärbilärenä dä bulırğa tieş, digän fiker äytte. Şulay itep, Çeçnya probleması federativ däwlät wäkälätlär büleşü şartnamäse, möstäqillek, suverenitet digän töşençälärdän başqa bulmayaçağın kürsätte.