Accessibility links

Кайнар хәбәр

Ministrlar Kabinetınıñ sişämbe brifingında urta häm yuğarı belem perspektivaları turında süz bardı


Uzğan xäbärebezdä Qazan Däwlät universitetınıñ 200 yıllığına äzerlek mäs’älälärenä bağışlanğan utırışta universitet ğalimnäreneñ dä suverenitet töşençäsen onıtıp baruları turında söylägän idek. Älbättä, şundıy auditoriädä äytelgän tänqit iğtibarsız qaldırıla almıy. Ministrlar Kabinetınıñ çirattağı brifingı mäğärif, urta häm yuğarı belem perspektivalarına bağışlanuı da oçraqlı tügel. Brifing başlanuğa diärlek, Tatarstan yuğarı uqu yortları rektorları şurası räise Nail Xäyrullin Qazan universitetınıñ yuridik fakul'tetında mögällimnär öçen xoquqi belem birü üzäge buldırıldı, dide.

Ä brifingta süz 2002 yıl yomğaqları häm kiläçäktä kötkän yañalıqlar, problemalar turında bardı. Mäğärif ministrı Faris Xarisov respublika mäğärifeneñ Rusiädä aldınğılar rätendä buluın dälilläwçe statistika, sannar kiterde. Läkin kiläçäktä mäğärif sistemasın, mäktäplärne zur sınaw sağalap tora. Demografik wäzğıät qatlawlana. Balalar sanı kimi. İnde kiläse uqu yılında berençe sıynıfqa kilüçe balalar sanı 26 meñgä kimi. Awıl cirendä mäktäplärne restrukturizatsiä, yäğni bezneñçä äytkändä, taratu, yabu protsesı başlana. Brifingta bu problemağa jurnalistlar da bik iğtibar birde. Läkin mäs’äläneñ asılına qağılışlı sorawlar birüçe bulmadı. Şulay da, mondıy sorawlarğa cawap ezläwçelär, uylanuçılar brifingqa kilüçelär arasında bar ikän. Akademik Mäxmüt Äxmätcanov “Azatlıq““ radiosına brifingtan alğan tä’sirläre turında bolay dide.

AUDİO: (Mäxmüt Äxmätcanov tatar mädäniätenä, mäğrifätenä patşa zamanınnan birle alıp barılğan tiskäre qaraşqa tarixi faktlar kiterä. Kommunizm tözü çorında nindider tarixi tamırlarınnan, millätennän, mädäniätennän ayırılğan şäxeslär tärbiäläw cämğiätneñ bozıqlığına kiterde. Äxlaqsızlıq, eçüçelek, bigräk tä awıl cirendä, ğailälär tarqaluına kiterä, di.)

Ä yuğarı belem belän citäkçelek itüçelär demografik wäzğıät, balalar sanı kimü dulqını äle yuğarı uqu yortlarına 2-3 yıldan ğına kilep citäçäk, dilär. Yäğni, ber urınğa 10 keşelek konkurslar häm distälärçä meñ yuğarı belemle yuristlar, uqıtuçılar, iqtisatçılar, bankirlar çığarıp toru däwam itäçäk. Bu xäl eşsezlekne, yuğarı belemle kibetçelär, traktorçılar, şoferlar sanın arttırmasmı soñ? Rektorlar, yuğarı belem belän idärä itüçelär arttırmıy, dip sanıy. Rusiädä, şul isäptän Tatarstanda, 10 meñ keşegä 363 yuğarı belemle turı kilsä, Amerikada 500 artıq ikän. Yuğarı uqu yortları studentlar sanın ber tuqtawsız arttıruda cämğiätkä ni fayda?

Häm bıyıl da distälärçä meñ studentlar sanına kerergä omtıluçılar öçen brifinğa işetelgän ber yaxşı xäbär. Tatarstan yuğarı uqu yortlarına kerü öçen berdäm imtixan eksperimentında qatnaşmıy. Yäğni, bıyıl da Tatarstanda mäktäplärdä çığarılış imtixannarı ayırım, yuğarı uqu yortlarına imtixannar ayırım.
XS
SM
MD
LG