Accessibility links

Кайнар хәбәр

Ğiraq suğışında tağın ber kön: Säddam Ğiraqqa ciñü wäğdä itä


Ğiraq suğışınıñ cir öste bäreleşläre öleşendä berniçä kön çağıştırmaça sülpänlek bulğannan soñ bügen yañadan tönyaqqa, Bağdadqa taba köçle höcümnär başlanu mömkinlege turında xäbärlär kilde. Reuter agentlığınıñ ber xäbärçese koalitsiä köçläreneñ tönyaqqa taba xäräkät itä başlawı, alarğa ällä ni qatı qarşılıq kürsätelmäwe turında belderä. Reuternıñ ikençe ber xäbärçese Luke Baker aldağı säğätlärdä bik küp aktivlıqlar bulırğa mömkin dip äytä. AQŞnıñ yuğarı xärbi citäkçeläre cir öste operatsiäsendä tänäfes buluın kire qaqsa da qayber xärbilär uzğan atna axırında tänäfesneñ bik ozaqqa suzılu mömkinlege turında kisätkkän ide.

Bügen Hilla häm Diwania şähärläre yanında bäreleşlär däwam itte. Ğiraq mäğlümät ministrı Möxämmät Säit äs-Sahaf Ğiraq ğäskärläre Britan köçläreneñ Mosul şähäre tiräsenä töşep utıruına yul quymadı dide. Britaniä tışqı eşlär ministrı Jack Straw Ğiraqta koalitsiäneñ xätbi kampaniäse totrıqlı xäräkät däräcäsenä citte, ämma bäreleşlär däwam itkändä xärbilär häm tınıç xalıq arasında yaña qorbannar bulırğa mömkin dip belderde.

Hawa höcümnäre isä daimi räweştä däwam itä. Bügen Bağdad, Kerbala häm Basra şähärläre qatı bomba utına totıldı. Bağdadtan 80 çaqrımlap könyaqtaraq urnaşqan Hilla şähärendäge xastaxanä mödire Murtaba Abbas koalitsiäneñ bügenge bombalawlarınnan tınıç xalıq arasında 33 keşe hälak buldı, 300-dän artıq keşe yaralandı, alar arasında xatın qızlar häm balalar da bar dip belderde. Anıñ äytüençä, şähärneñ könyağındağı, xalıq yäşi torğan öleşe bombalanğan. Ämma bu belderüne bäysez çığanaqlar aşa raslaw mömkin tügel. Bu xastaxanägä barğan Reuter xäbärçeläre xastaxanägä kimendä 11 mäyet kiterelüen kürüläre turında belderä. Alarnıñ kübese balalar dielä. Xalıqara Qızıl Xaç oyışmasınıñ Bağdadtağı wäkile Roland Huguen-Benjamin üz törkeme belän Hilla xastaxanäsenä baruı häm anda izelgän distälärçä mäyet kürüe turında belderde.

Kiçä AQŞ xärbiläre tikşerü qapqası yanında tuqtawdan baş tartqan maşinağa ut açqannan soñ andağı kimendä 8 xatın-qız häm bala hälak bulğan ide. Bügen Şatra şähäre yanında şundıy uq xäl qabatlanıp qoralsız ber ğiraqlı üterelde. AQŞ Generalı Vincent Brooks atna axırında tikşerü qapqasında 4 amerikan soldatın ütergän intixarçı höcümennän soñ iminlek protseduraları qırıslatıldı häm anı yomşartırğa cıyınmıybız dip belderde. Brooks tınıç xalıq arasında qorbannar buluı qotılğısız dip äytte. Bügen Ğiraq vitse prezidentı Taha Yassin Ramadan tağın ber märtäbä, AQŞ citäkçelegendäge köçlärgä qarşı intixar höcümnäre däwam itäçäk dip kisätte.

AQŞ generalı Brooks älegä ğiraqta küpläp üterü qoralları tabılmadı dide:

AUDİO: Älegä bez bernindi dä küpläp üterü qoralı tapmadıq. Ämma bez monıñ mömkinlegen kürsätüçe, alarnı qullanu teläge buluın kürsätüçe dälillärne taba kiläbez. Tik älegä alarnıñ üzlären tapmadıq.

Bügen Ğiraq mäğlümät ministrı äs-Sahaf Ğiraq prezidentı Säddam Xösäinneñ Ğiraqqa ciñü wäğdä itkän çığışın uqıp birde. Älege çığışta Cihad ul burıç dielä. Televidenie Säddamnıñ üzen soñğı märtäbä uzğan şimbädä kürsätkän ide. Anda Ğiraq citäkçese ministrlar belän oçraşuda kürsätelde.

BMOnıñ UNİSEF oyışması humanitar yök töyägän ike maşina 3 kön tamojnyada totılğannan soñ bügen Törkiädän Ğiraqnıñ tönyağına kerde dip xäbär itte. Alar 16 tonna azıq-tölek häm su çistartu öçen 6 tonna maxsus matdä alıp kilä. Çik buyında humanitar yardäm kiterüçe tağın 40-lap maşina tora dielä.

Älegä Ğiraqnıñ könyağındağı Um-Qasr portı yabıq tora. Port humanitar yardäm kitergän ber genä korapnı qabul itte. Ul uzğan comğada buldı.

Bügen Yewropanıñ tärräqiät häm humanitar yardäm komissionerı Poul Nielson humanitar yardäm taratuda AQŞ häm Britan xärbiläre qatnaştırılmasqa tieş dide. Anıñ äytüençä, bu humanitar yardäm eşenä zıyan kiterä.

Naif Aqmal, Praga.
XS
SM
MD
LG