Accessibility links

пәнҗешәмбе, 8 декабрь 2016, Казан вакыты 03:12

Suğış qırındağı xäbärçebez Ron Synovitz belän äñgämä


Ğiraqtağı xärbi çaralarnı Azatlıq radiosı xäbärçeläre suğış qırınnan da küzätep bara. Xäbärçelärebezneñ berse Ron Synovitz AQŞ armiäseneñ 3-nçe cir öste diviziäsenä berketelde. Bügen bez annan Kerbala şähäre tiräsendäge bäreleşlär häm 3-nçe diviziädäge 2-nçe xärbi brigada soldatlarınıñ ruxi xäläte turında soraştıq.

SORAW: Sez xäzer qayda? Ütkän könnärdä anda nilär kürdegez?



CAWAP: Xäzer bez Kerbala tiräsendäge aldınğı saftağı höcüm bülege yanında. Ütkän 6 köndä min Kerbala yanında, şul isäptän könbatış yaqta da, könçığışta da Cömhüriät Saqçıları pozitsiäläreneñ bertuqtawsız hawa, raketa häm artilleriä höcümnärenä totıluın kürdem. Amerikan köçläre xäzer tönyaqqa, Bağdadqa taba omtıla.



SORAW: AQŞ köçläre Tigris yılğasın uñışlı kiçep çığıp Kuttan Bağdadqa baruçı töp yul bulğan 6-nçı olı yulnı kontrol’gä aldı digän xäbärlär bar. Monı raslıy alasızmı? Bu turıda täfsilleräk mäğlümät yuqmı?



CAWAP: Xäbär itelgän ul xällär bu tirädä bulmadı. Şuña kürä üz küzlärem belän kürdem dip raslıy almıym. Şulay da, monda miña işetelgän xäbärlär ul mäğlümätlärneñ döres buluı turında söyli.



SORAW: 3-nçe divizädäge 2-nçe xärbi brigadanın ruxi xälate nindieräk?



CAWAP: Mondağı AQŞ ğäskärläre alğa taba kütärenke rux belän xäräkät itä. Könbatışta xäbärlär belän tanışqannan soñ xalıqta Bağdadqa taba xäräkät aqrınayğan yäki xätta tuqtalğan digän tä’sir qaladır. Ämma ber närsäne isäpkä alırğa kiräk, uzğan Farsı qultığı Suğışında cir öste bäreleşläre başlanır aldınnan hawa höcümnäre 5 atna buyı däwam itte. Bu yulı isä cir öste suğışı hawa höcümnäre belän ber ük waqıtta diärlek başlandı. Şuña kürä cir öste ğäskärläre xäzer hawa höcümnären yaqınnanraq kürä. Bu Cömhüriät Saqçılarına häm Ğiraqnıñ başqa köçlärenä qarşı hawa höcümnären näticäleräk tä itä. Cönki AQŞ cir öste ğäskärläre Ğiraqnıñ Cömhüriät saqçıların häm regulyar armiäse urnaşqan urınnarnı kürerlek pozitsiädä bulu säbäple AQŞ hawa höcümnäreneñ tögällege bik nıq arttı.



SORAW: Sez bulğan urında AQŞ höcümnäre Ğiraq köçlärenä ni däräcädä zıyan kiterde? Ğiraqnıñ xärbi mömkinlekläre nıq qına kimede dip sanalami?



CAWAP: Suğış qırındağı AQŞ köçlärenä berketelgän xäräbçe bularaq miña quyılğan häm min qabul itkän taläplär nigezendä, hawa höcümnärennän Ğiraqnıñ Cömhüriät Saqçılarına ni däräcädä zıyan kilgän dip isäplänüe turında miña tögäl genä äytep birü röxsät itelmi. Ämma şunısın ışanıçlı räweştä äytep bula, bik qatı hawa höcümnäre alıp barıldı häm Ğiraqnıñ yuğaltuları bik tä bik tä zur. Bu şulay uq alğa, Bağdadqa taba omtıluçı cir öste ğäskärläreneñ dä ışanıçın arttıra. Bu xäbär xärbilärneñ matbuğat xezmätkärläre xäbärçelärgä birgän mäğlümätlär nigezendä äzerlänmäde. Bu xäbär AQŞ xärbiläreneñ üz ğäskärlärenä birgän mäğlümätlär nigezendä äzerlände.



SORAW: Kerbala yanındağı AQŞ höcümnäre kübesençä Cömhüriät Saqçılarınıñ Mädinä Diviziäsenä qarşı oyıştırıldı dip xäbär itelä. Sez monı raslıy alasızmı?



CAWAP: Bügen höcümnärneñ zur öleşe Respublika Saqçılarınıñ Mädinä diviziäsenä qarşı yünältelä. Ämma, kötmägändä, soñğı berniçä köndä Bağdadnıñ könyaq-könbatışındağı bu tirädä AQŞ köçläre Cömhüriät saqçılarınıñ Nebuqatnäzzar diviziäse xärbilärenä dä yulıqtı.



SORAW: AQŞ armiäse, şul isäptän, 3-nçe cir öste diviziäse Ğiraq ğäskärlärenä qarşı sünderelgän uranlı qorallar qullana. Sez mondıy qorallar qullanuın kürdegezme?



CAWAP: Biredä minem bu suğışta kürgän iñ qotoçqıç xällärneñ berse 6 Ğiraq soldatı belän tup-turı AQŞ pozitsiäsenä taba kilüçe Nissan maşinasına qarşı sünderelgän uranlı 25 millimetrlı qoral qullanu näticäse buldı. Ğiraq regulyar armiäseneñ bu soldatları AQŞ pozitsiälärenä taba ike raketa atqannan soñ 30-35 metr qala AQŞnıñ Bradley xärbi maşinası sünderelgän uran qullanılğan qoral belän alarğa ut açtı. Mondıy qoraldan keşeneñ nindi xälgä kilüen küz aldına da kiterä almassız. Anda kümerlängän söyäklärdän başqa berni dä qalmağan ide. Maşinadan 15 metr arttaraq qalğan ber ğiraq soldatı şartlaw dulqınınınnan hälak buldı.



SORAW: Soñğı soraw. Qayda buluığız, aldağı berniçä köndä 3-nçe diviziäneñ närsä eşliäçäge turıdna ni äytä alasız?



CAWAP: Xärbi ser bulğanğa kürä, miña alda bulaçaq xällärne sürätläw röxsät itelmi. Ämma şunısın añlarğa kiräk, AQŞ armiäseneñ 3-nçe cir öste diviziäse tiz xäräkät itü öçen küp künegülär ütkän. Häm bu wäzğiättä diviziä näq öyrätelgänçä xäräkät itär kebek.
XS
SM
MD
LG