Amerikan Däwlät sekretare Colin Powell bügen Törkiä Tışqı eşlär ministrı Abdullah Gül belän oçraştı. Törkiä Ğiraq Kördläreneñ kübräk bäysezlek aluına borçıla, mondıy tärräqiätneñ Törkiäneñ Kördlär yäşägän töbäklärenä dä tä’sir itüe ixtimal. Quşma Ştatları, Tönyaq Ğiraqqa Törek ğaskärläreneñ küpläp kerüe “suğış eçendä suğış” buldıra ala digän borçıluın beldergän ide.
Powell, Törkiäneñ Tönyaq Ğiraqqa östämä ğaskär kertüenä kiräk qalmadı, dide. “Bez, törek duslarıbızğa, wazğiätne kontroldä tota aluıbıznı kürsättek. Bez xällärne küzätep barabız, Törek ğaskärläreneñ çik aşa ütüenä kiräk yuq” dide Powell.
Powell şulay uq premyer-ministr Recep Tayyip Erdoğan, qorallı köçlär başlığı general Hilmi Özkök häm prezident Ahmet Necdet Sezer belän oçraştı. Abdulla Gül kiçä, suğış mäs’äläsendä Amerika Quşma Ştatlarınnan başqa üteneçlär bulmas dip beldergän ide, läkin Colin Powell Törkiäne Ğiraqqa humanitar yardäm kürsätergä, häm Tönyaq Ğiraqtağı Amerikan ğaskärlärenä yardäm itergä çaqırdı. Änkaradan soñ Powell säfären Belgradqa däwam itä, anda Serbiä häm Çernogoriä citäkçelege belän oçraşu kötelä, säfäreneñ soñğı tuqtalışı isä-Brussel. Anda Quşma Ştatları Däwlät Sekretare NATO häm Yevropa Berlege räsmiläre belän söyläşülär uzdıraçaq.
