Accessibility links

Кайнар хәбәр

Ğiraq suğışı “xäl itkeç çorına” kerä


Farsı qultığındağı Britan ğaskärläre başlığı Ğiraq suğışı üzeneñ “xäl itkeç çorına” kerä, dip belderde. Xärbi hawa köçläre marşalı Brian Burridge BBC radiosına birgän äñgämäsendä, koalitsiä köçläre elekkegeçä tınıç xalıqqa höcüm itmäw taktikasın däwam itä, dide. Britan ğaskärläre Basra şähäre yanında tuplanğan, läkin äle anı üz kontrolenä ala almıy. Burridge süzlärenä qarağanda, Säddäm Hösiän rejimın yuq itkänçe äle tağın küpmeder waqıt uzaçaq. Amerikan ğaskärläre Bağdadqa könyaqkönçığış häm könbatıştan yaqınlaşa. Tigris yılğası aşa küper alınğan, Kerbala şähäre yanında Ğiraq cömhüriät saqçıları belän bäreleşlär däwam itä. Quşma Ştatları xärbi köçläreneñ Bağdadqa taba yulında cömhüriät saqçlılarınıñ Mediä deviziäse häm Kut şähäre yanında Bağdad diviziäse tora. Bağdadta üzäktäge prezident sarayı utqa totıldı. Xärbi oçqıçlar şulay uq tönyaq Ğiraqta Mosul şähäre tiräsendäge qorılmalarnı da bombaladı. Najaf şähäre yanında boralaqlar häm xärbi oçqıçlardan qorallanğan fidayınnarğa ut açıldı. Ğiraq televideniäse bügen Säddäm Hösäin Ğiraqnıñ yuğarı räsmi wäkilläre, şul sanda ike ulı Uday häm Qusay qatnaşında utırış uzdırdı, dip xäbär itte. Utırış kürsätelmäde, bu xäbär bäysez mäğlümat çaralarında raslanmağan.
XS
SM
MD
LG