Accessibility links

шимбә, 10 декабрь 2016, Казан вакыты 02:05

Tatarlarğa Amerikadan öräk yasawdan ni fayda da, ni zıyan?


Älbättä, Tatarstannan suğış yıraq. Häm bu inde bezneñ xalıq üz cilkäsendä tatığan aç-yalanğaç, kön sayın distälägän meñ qorban kitergän suğış tügel. Xalıq tınıç qına suğışnı televizorlarınnan kino qarağanday qarıy da, üz mäşäqätlärenä çuma. İctimaği oyışmalar da, berençe könnärdäge kebek, çäbälänmilär. PR-kampaniä kebek ber imzalar cıyu, miting oyıştırıp aldılar da tınıçlandılar.

Azatlıq, xörriät, demokratiä öçen köräşüçe ictimaği oyışmalarğa bu töşençälärneñ şıtımnarı, nigezlämäläre qayda barlıqqa kilgänen iskä töşerüçelär dä bar. Şulay, Amerikada yäşäwçe millättäşebez Vil' Mirzayanov Amerika Quşma Ştatlarınıñ 1959 yılda qabul itelgän “Qollıqqa töşkän xalıqlar” turındağı qanunında açıqtan-açıq tatarlar xaqı yaqlanğanın iskä töşerä. Bu qanunda qollıqqa töşkän millätlär isemlege birelgän. Şul isäptän İdel-Ural xalıqları da. Şulay uq tantanalı töstä Amerika prezidentı yıl sayın şul xalıqlarnıñ irekläre turında xäbär itärgä xoquqlı häm tieş, dip yaza Wil Mirzayanov. Ä menä Amerika prezidentına xäbär itkändä, xisap totqanda, söyläw öçen mäğlümat ictimaği oyışmalardan kilep toruı mäslixät tä, läkin mondıy möräcäğätlär häm xatlar moñarçı Tatarstannan kilep ireşmägän ikän äle. Monın xaqında häm Bötendönya tatar ligasınıñ şäräfle räise Ali Aqışnıñ älege qanunğa möräcäğät itärgä çaqıruı turında häm New-Yorkta yäşäwçe millättäşebez Sabircan Bädretdinneñ Amerikağa qarşılıqqa tatar millätçeläreneñ ğäcäplänüe xaqında İtertat.ru säxifäsendäge “AQŞtan öräk yasaw tatarğa faydalımı?” digän mäqälädä täfsille söylänä.

Suğış öräge Tatarstanda tağın kemne örketä soñ. Berençe çiratta, älbättä, çemodan turizmı häm çın yal-säyäxät turizmı belän şöğellänüçelärne. Tatarstannıñ bu ölkädä Törkiä bik uñay, bik populyar. Şuşı könnärdä Törkiäneñ Qazandağı general' konsulı İsmail Safa Yudcär Törkiädä turizm xällärenä bağışlanğan matbuğat oçraşuı ütkärde. Oçraşuda Tatarstannan Törkiägä turizm säyäxätenä yıl sayın 20 meñläp keşe bara, dielde. Bıyıl suğış çığu säbäple wäzğıät niçek bulır.

General' konsul jurnalistlarğa Törkiägä kilüçe turistlarğa borçılırğa urın yuq, barlıq yal urınnarı suğış barğan cirdän meñ yarım çaqrım yıraqlıqta urnaşqannar, dip belderde. Şulay da, Qazanda aprel' ayında Törkiädä ber atnalıq yalnı yul xaqı belän bergä 190, xätta 167 dollarğa täqdim itüçe turistik firmalar bar. “Salawat” firmasınıñ citäkçese Kamil' äfände mondıy bäyälär täqdim itelü Törkiädä yal itärgä teläk belderüçelärneñ azayuı, berniqädär psixologik kirtä barlıqqa kilüe belän añlattı. Läkin älegä turizmnı çikläwçe bernindi dä räsmi kürsätmälär, kisätülär yuq.

XS
SM
MD
LG