Amerika Quşma Ştatları däwlät sekretare Colin Powell NATO häm Yevropa Berlege däwlätläre tışqı eşlär ministrları belän oçraşular başladı. Brusseldäge söyläşülär suğıştan soñ Ğiraqnı tözekländerügä bağışlana. Powell inde NATO General Sekretare George Robertson, Çexiä, Macarstan, İspaniä häm İtaliä tışqı eşlär ministrları belän oçraşqan. Powell şulay uq, Amerikanıñ Ğiraqta suğış alıp baruına kisken qarşı çıqqan Fransiäneñ tışqı eşlär ministrı Dominique de Villepin belän oçraştı. Xäzerge waqıtta Berlektä räislek itkän Gretsiäneñ tışqı säyäsät başlığı George Papandreou, Yevropa illäre, Ğiraqnı torğızuda Berläşkän Millätlär Oyışmasınıñ role zur bulırğa tieş dip sanıy, dide. “Ğiraq krizisınıñ här çorında Berläşkän Millätlär Oyışmasınıñ rolen kürergä telibez. Bezne älbättä humanitar mäs’älälär dä borçıy. Yaqın Könçığışta tınıçlıq urnaştıru eşeneñ alğa kitüen telibez”, dide Gretsiä tışqı eşlär ministrı George Papandreou.
Yevropa Berlege tışqı säyäsäte başlığı Javier Solana, suğıştan soñ Ğiraqnı tözekländerü turında söyläşergä äle irtä, xäzer iğtibarnı humanitar mäs’älälärgä yünältik, dide.
Amerika Quşma Ştatları Ğiraqtağı suğışta “Vilnius unlığı”na kergän däwlätlärneñ xuplawın ber qayaçan da onıtmayaçaq. Şuşı süzläre belän Colin Powell “unlıqqa” kergän Albaniä, Bolğarstan, Xorvatiä, Estoniä, Latviä, Litva, Makedoniä, Rumıniä, Slovakiä häm Sloveniä illärenä räxmäten belderde. Quşma Ştatları, suğışqa xuplawnıñ awır şartlarda belderelgän buluın tanıy. Yevropa Berlege äğzaläreneñ suğışqa qarşı toruları sürätendä bu 10 däwlätkä dä Ğiraqtağı xärbi çaralarnı xuplap çığu ciñel bulmağandır, dide Powell.
Şulay uq, Quşma Ştatlarnı İran, Süriä häm Tönyaq Korea kebek “problemalı” illär dä borçıy. Läkin Waşington alarğa qarşı suğış başlarğa telämi, dide Colin Powell.
