Accessibility links

җомга, 9 декабрь 2016, Казан вакыты 03:06

Bağdad Xalıqara Hawa Alanı AQŞ xärbiläre kontrolendä


Quşma Ştatları xärbiläre uzğan töndä amerikan ğaskärlärenä 2 meñ yarımğa yaqın Ğiraqnıñ Cömhüriät Saqçıları birelgän dip xäbär itte. Qatardağı Üzäk Xärbi idarädän kapitan Frank Thorp, birelgännär-Bağdad diviziäse xärbiläre ide, dip belderde. Bezneñ Ğiraqtağı xäbärçebez, töne buyı barğan bäreleşlärdän soñ Amerikan ğaskärläre başqaladağı Säddäm Xalıqara Hawa alanın üz kontrolenä alğan dip söyläde. Amerikan xärbiläre Säddäm hawa qırın Bağdad Xalıqara Hawa Alanı iseme belän alıştırdı. General Vincent Brooks, aeroprtnıñ yaña iseme-Ğiraq kiläçägenä işekne aça, dip belderde. “Amerikan armiäseneñ 5nçe korpusı Bağdad yaqınnarında Ğiraq köçlärenä höcüm itte häm başqalanıñ könyaq rayonnarın üz kontrolenä aldı. Bäreleşlär töne buyı tañ atqançığa qadär däwam itte , koalitsiä köçläre Bağdadnıñ könbatışındağı xalıqara hawa mäydanın üz kontrolenä aldı. Elek Säddäm Aeroportı xäzer Bağdad Xalıqara Hawa Alanı isemen yörtä häm bu-Ğiraqnıñ kiläçägenä işekne aça”, dide general Brooks. Bağdad tiräsendä Quşma Ştatlarnıñ cir öste ğaskärläre häm Ğiraq Cömhüriät saqçıları arasında bäreleşlär däwam itä. Kiçä Bağdadtan 130 çaqrım yıraqlıqta Haditha Dam tikşerü noqtasında intixar terrorçısı 3 koalitsiä xärbien, yökle xatınqıznı häm tağın ber keşene häm üzen şartlattı. 2 xärbi yaralanğan. Qatardağı Üzäk Xärbi İdaräneñ matbuğat wäkile Jim Wilkinson, xärbi bulmağan maşina tikşerü noqtasına yaqınlaşqaç annan xatın-qız çığıp qıçqıra başladı, şul arada maşinada şartlaw yañğradı, dip xäbär itte. Ğiraq xökümäte –mondıy terror ğamällären ğadäti xärbi taktikağa kertäçägen beldergän ide. Britaniä Saqlanu ministrı Geoff Hoon, Ğiraq suğışında “çäçelüçän” bombalarnı qullanunı yaqlap, alarnıñ koalitsiä köçlären saqlar öçen kiräk buluın belderde. BBC radiosına Hoon, alarnı qullanu qanun qısalarına sıya, dide. Ber britan L-20 bombasında 49 waq öleşe bar. Keşe xoquqları oyışmaları, klaster bombalarnıñ barlıq öleşläre dä şartlap betmi, soñınnan tınıç xalıqqa qurqınıç tudıra, dip “çäçelüçän” bombalarnı qullanuğa qarşı çığa.

XS
SM
MD
LG