Fransiädä çığuçı Le Figaro basmasına birgän äñgämäsendä Quşma Ştatlar Däwlät Sekretare Colin Powell suğıştan soñğı Ğiraqnı tözelkländerügä Berläşkän Millätlär Oyışması da qatnaşaçaq, dip belderde. Oyışma humanitar, tözeleş häm xakimiät urnaştıru mäs’älälärendä yardäm itä alaçaq. Oyışmanıñ burıçları qısqa waqıt eçendä bilgelänäçäk, dide Colin Powell.
Amerika Quşma Ştatları zur ixtimal belän Ğiraqta bötenlegen häm iminlegen saqlawğa öleş kertäçäk. İl belän idarä itü eşe Säddäm rejimınnan azat itelgän cirle xakimiätlärgä tapşırılaçaq. Älege üzgäreşlärneñ qayçan başlanaçağı turında Colin Powell ber süz dä äytmäde.
Yevropa häm Quşma Ştatları arasındağı mönäsäbätlärne caylaw waqıtı citte, läkin säyäsi mäs’älälärdä bulğan fiker ayırmalıqları borçu tudıra, dide Powell. Ğiraqta tözekländerü eşlärenä qatnaşuları tıyılğan şirkätlär isemlege yuq, kemneñ Ğiraqta nindi eş başqaraçağına yaña Ğiraq xökümäte qarar bireräçäk, dide Amerikan Däwlät sekretare Powell.
Suğıştan soñğı Ğiraq belän Ğiraq xalqı idarä itergä tieş. Bu xaqta Britaniä premyer-ministrı Tony Blair Ğiraq xalqına açıq xatında yazdı. Ğiraqta suğış betkänç Beläşkän Millätlär Oyışması da, Amerika da, Britaniä dä xakimlek itmiäçäk, dielgän anda. Xat internetta dönya küräçäk häm Britan ğaskärläre tarafınnan Ğiraqta xalıq arasında taratılaçaq. Blair , şulay uq, Britan ğaskärläre suğış betkäç tä Ğiraqtan çığıp kitäçäklär, dip belderde.
Colin Powellneñ Ğiraqnı tözekländerügä qatnaşırğa telägännnär isemlege çiklängän bulmayaçaq digän süzlärenä qaramastan Quşma Ştatları wäkillär palatası Fransiä, Germaniä häm Süriäne suğıştan soñğı Ğiraqnı tözekländerü eşenä qatnaştırmaw turında byudjetqa tözätmä kertte. Anda şulay uq bu 4 däwlätkä tözekländerü eşeneñ barışı turında mäğlümat tä birmäskä, dielgän. Qıtayda räsmi säfärdä bulğan Rusiä tışqı eşlär ministrı urınbasarı Yuri Fedotov Ğiraqnı ayaqqa bastıru-Quşma Ştatlar eşe tügel, anı Berläşkän Millätlär Oyışması qayğırtırğa tieş, dip moña qarşı bulğanın belderde.
Kongressnıñ wäkilläre palatası häm senat arasında bulğan bu fiker ayırmalıqların Amerikan qanunçığaruçıları 11 aprilgä qadär prezident George Bushqa cibäräçäk.
