Accessibility links

дүшәмбе, 5 декабрь 2016, Казан вакыты 19:33

Mintimer Şäymiev Alabuğada gomumrusiä problemaları turında söyläde


İnde xäbär itkänebezçä, Tatarstan Prezidentı Mintimer Şäymiev kürşe Udmurtiä Respublikasınnan qaytışlıy Alabuğa şähärendä berkönlek tuqtalış yasadı. Şäymievneñ Udmurtiägä baruı ber atuda ike quyan digänräk mäğnädä bulğan dip äytergä bula. Anda ike yaq öçen dä otışlı kileşülär imzalanğan häm dä Udmurtiäneñ 6 aprel'dä uzaçaq Däwlät Sovetına saylawlar aldınnan Qazannan “Berdäm Rossiä” räistäşeneñ kilüe cirle vlast'qa zur moral' yärdäm bulğan.

Alabuğada isä Mintimer Şäymiev ireşkän uñışları öçen şähär häm YeLAZ citäkçelären maqtap qına qalmadı, gomumrusiä problemaları xaqında kinänep söyläde. Mäsälän, Çeçnyada referendum uzdıruda, Konstitutsiä qabul itüdä Tatarstan prezidentı respublika citäkçelege totqan qiblanıñ döres ikänen rasladı, dip sanıy. Putinnıñ Çeçnya belän kileşü tözü turındağı täqdime dä – bezneñ öçen sallı argument. Ägär Rusiä eçendäge Çeçnya belän kileşü imzalana ikän, Tatarstan nigä çittä qalırğa tieş? Qanun barsı öçen dä ber bulırğa tieş bit. Şulay da, täñgälläşterü säyäsäte älegä Tatarstanğa qarşı däwam itä. Bu xaqta, mäsälän, Rusiä yuğarı mäxkämäseneñ Alabuğa irekle iqtisad zonasın oyıştıru turındağı Tatarstan parlamentınıñ qararın ğämäldän çığaruı açıq söyli. Tatarstan prezidentı mondıy uñışlı eşläp kilgän qanunnarnı kire qağunı tänqitläp uzdı. Çınnan da, formal' teläklärdän çığıp, Rusiä xoquqçıları yış qına söt birä torğan sıyırnı suyarğa ämer birälär. Mäxkämä qararın inqär itep bulmawın añlap bulsa kiräk, Mintimer Şäymiev ömetle investitsiä proyektların qabul itärgä, respublika salımnarınnan azat itärgä digän täqdim yasadı.

XS
SM
MD
LG