Accessibility links

якшәмбе, 11 декабрь 2016, Казан вакыты 01:24

Ğiraq suğışı: soñğı waqiğalar


Bügen Ğiraq başqalasında härköndägeçä bombalawlar näticäsendä qatı şartlawlar buldı. İrtän şähärneñ könyaq-könbatışı artilleriä utına da totıldı dip xäbär itelä. Kiçä AQŞ xärbiläre amerikan köçläre tanklar häm xärbi maşinalar belän Cömhüriät Saqçıları köçlären bärep şähärgä könyaqtan kerde häm könbatışqa, hawa alanına taba çığıp kitte dip beldergän ide. Ğiraq mäğlümät ministrı Möxämmät Säit äs-Sahaf Bağdad haman da qatı kontrol’dä dip beldersä dä, AQŞ general mayorı Victor Renuart xäzer AQŞ köçläre Bağdadqa niçek häm qayçan kerergä teläsälär şulay kerä ala dide. Quşma Ştatlar uzğan comğada kontrol’gä alınğan hawa alanındağı oçış yullarınıñ kimendä berseneñ tizdän koalitsiä oçışları öçen safqa basaçağın iğlan itte. Bağdad isä hawa alanı bezneñ kontrol’dä dip täqrarlıy.

AQŞ prezidentı George Bush atnalıq radioçığışında Ğiraq köçläreneñ soñğı könnäre citte dip belderde:

AUDIO: Amerika häm koalitsiä köçläre daimi räweştä Säddam Xösäin xakimiätenä taba bara. Alar härber yaña awılnı azat itkän sayın bezneñ köçlär bu xakimiätneñ räximsezlekläre häm Ğiraq xalqına diktator señdergän qurqu turında kübräk belä.

Kiçä AQŞ general leytenantı Michael Moseley koalitsiäneñ hawa köçläre cir öste köçlärenä yardäm kiräk bulğan çaqta tiz arada yardämgä kilü öçen Bağdad östendä täwlek buyı patrul’ oçışları başladı dide.

Reuter agentlığı Şimbä kiçendä Bağdad üzägendä Ğiraq suğışın yaqtırtuçı küp kenä jurnalistlar yäşäwçe Fälestin qunaqxanäsennän 100 metr yıraqlıqta ğına bomba töşep şartladı dip xäbär itä. Ğiraq mäğlümät ministı äs-Sahaf ta ğädättä şul tirädäge binada xalıqara jurnalistlar belän oçraşa. Soñğı oçraşu bomba töşär aldınnan ğına bulğan ide. Reuter xäbärçese bu bombanıñ biredäge berär qorılmağa maxsus taşlanğanmı yäki yalğış töşkänme ikänlege mäğlüm tügel dide.

Kiçä kiç Ğiraq televideniese prezident Säddam Xösäinneñ ike ulı, ölkän yardämçeläre häm xärbi citäkçelär belän oçraşuın kürsätte. Televizordan kürsätelgän tasmada Säddam ber täräsäse dä bulmağan yabıq bülmädä zur östäl yanında yılmawıp utıra ide. Anıñ yanında ulları Qusay belän Uday da bar ide. Tasmanıñ qayçan töşerelgäne bilgele tügel. Älege tasma kürsätelgängä qädär köndez Ğiraq mäğlümät ministrı äs-Sahaf Säddamnıñ tağın ber märtäbä tınıç xalıqnı häm xärbilärne koalitsiä köçlärenä qatıraq höcümnär oyıştırırğa çaqırğan belderüen uqıdı.

Xalıqara Qızıl Xaç oyışması xezmätkärläre kiçä xäbär agentlıqlarına, uzğan comğadan birle Bağdadnıñ 4 xastaxanäsenä yaralanğan berniçä yöz keşe häm distälärçä mäyet kiterelde dip belderde. Reuter agentlığı 17 kön buyı bomba häm raketa utına totılğan başqaladan meñnärçä keşe qaçtı dip xäbär itä.

Tönyaqta AQŞ häm körd köçläre töbäktäge ike töp neft’ üzägenä Mosul belän Kirkuk şähärlärenä yaqınraq kilde dip xäbär itelä. Körd köçläre Mosul yulındağı Domiz awılın yawlap aldıq dip belderä. Bağdadnıñ könyağında isä AQŞ xärbiläre Kerbala şähäre uramnarında Ğiraq köçläre belän bäreleşte.

Naif Aqmal, Praga.
XS
SM
MD
LG