Accessibility links

шимбә, 10 декабрь 2016, Казан вакыты 23:32

Amerikan xärbi köçläre Bağdadnıñ könçığışındağı Räşid hawa qırın aldı


Amerikan xärbiläre Bağdadnıñ könçığışında Räşid hawa qırın üz kontrolenä alğan. Bu xaqta Qatardağı Üzäk Xärbi İdarädä amerikan generalı Vincent Brooks belderde. Bağdadnıñ üzendä bäreleşlär däwam itte. Quşma Ştatları ğaskärläre başqalağa tönyaq häm könyaqtan höcüm itte. Xalıqara Qızıl Xac komitetı Bağdad xastaxanäläre bombalawda yaralanğannar belän tulğan, şähärdä su, medetsina kiräk yaraqlarına qıtlıq bar dip xäbär itte. Könyaqta, Britaniä xärbiläreneñ matbuğat wäkile polkovnik Chris Vernon, xakimiättäge Baath partiäse Basradan kitte, cirle xalıq Britan ğaskärlären şatlıq belän qarşı aldı, dip belderde. “Britan ğaskärläreneñ Basrağa kerüläre xuplap qarşı alındı, cirle xalıqta nixayät basımnan qotıluğa ışanıç barlıqqa kilde, könnän kön ul ışanıç arta bara”, dide Chris Vernon. Britan wäkile xäbär itüençä Ğiraqnıñ ikençe iñ zur şähäre bulğan Basra Britan ğaskärläre kontrolendä, läkin tulısınça iminlekne buldıru öçen äle tağın ber-niçä kön kiräk bulaçaq. Ğiraq mäğlümat ministrı Sahaf, Ğiraq köçläre amerikan xärbilären “cimeräçäk” dip belderde. Bağdadtan 100 çaqrım çaması yıraqlıqtağı Üzäk Ğiraqta hawadan boralaqlar häm xärbi oçqıçlar yardämendä Amerikan köçläre Ğiraq cömhüriät saqçılarına höcüm itkän dip xäbär itelä.

XS
SM
MD
LG