Accessibility links

Кайнар хәбәр

Ğiraq suğışına 3 atna tulğanda Bagdad üzägendä Saddam häykäle bärep töşerelde


Çärşämbedä Quşma Ştatlar citäkçelegendäge koalitsiä köçläre başqala Bagdadnı kontrol astına aluwın däwam itte. Ğiraq xärbiläreneñ qarşılığı kimi bara dip xäbär itelä. Saddamnıñ xakimiäte yuqqa çığa barğan sürättä, cirle xalıq xökümät binaların talıy başladı…

Çärşämbedä, Quşma Ştatlar citäkçelegendäge koalitsiä köçläre Bagdadnıñ xökümät binaların, töp yullarnı kontrol astına aluwın däwam itte. Amerikan xärbiläre şähärneñ üzägenä törle yaqlap yaqınaya. Diñgez pexotası könyaq-könçığıştan kilsä, 3-nçe cir öste diviziäse - könyaq-könbatıştan. Saddamanıñ Tigris yılğası buyındağı yaña sarayında bu diviziä idarä üzäge qora. Könbatış telekanalları turı efirda Bagdad uramnarın kürsätä. Amerikan tankları Tigris yılğasınıñ könçığış yarındağı ber parkka kerep urnaştı. Xärbilär äytüenä qarağanda Ğiraq köçläreneñ qarşılığı könnän-kön kimi bara. Uzğan töndä waq törkmenär alarğa siräk-miräk ut açqan bulsa, bügen bäreleşlär inde bik küzätelmägän. Cirle xalıq kolaitsiä köçlären çäçäklär belän qarşı almasa da, alarğa nigezdä xuplaw belderä, Saddam kitte digän süzlär qıçqırıp, anıñ xäykällären, sürätlären cimerä. Bagdad waqıtı belän kiçke 7-lär tiräsendä amerikan desantçıları Bagdad üzägendä Saddamnıñ 6 metrlı häykälen bärep töşerde. Mäydanğa cıyılğan xalıq sın qaldıqları östenä basıp biede:

Audio

Bezneñ Bagdadtağı xäbärçebez Ron Synovitz bügen Bağdad üzägednä reidta yörep qaytqan 15-nçe xärbi törkem citäkçese John Charlton belän söyläşte:

Audio: “Bez bügen dä, uzğan töndä şikelle atışular kötkän idek, di John. Läkin alar bulmadı, ä menö cirle xalıq bezneñ yanğa kilep räxmät uqıdı, xättä Pepsi, tämäke täqdim itte, balalırın bezneñ maşina östenä utırtıp qaradı.”

Ul arada başqalada Saddam xakimiäteneñ eze küzgä kürenep yuğala. Kön sayın belderü yasap kilgän Mäglümät ministrı Möxämmät Säet Äl-Sahaf bügen ber çığış ta yasamadı. Saddamnıñ isän bulu-bulmawı, isaän busla qayda ikäne älegä bilgesez. Tärtip saqlaw oyışmaları, politsiä köçläre uramnarda kürenmi. Şuşı wazğiättän faydalanıp cirle xalıq xökümät binaların talaw eşenä kereşte.

Alar räsmi binalarğa kerep computerlar, östäl-urındıqlar, kem närsä kütärä ala şunı taşıy. Bagdad xastäxanälärendä qatlawlı wazğiät saqlana. Yaralanğan keşelär sanı kön sayın artıp tora. Tabiplar täwlek äylänäsenä eşli, alarğa ğadi medikamentlar citmi.

Ğiraq xärbiläreneñ qarşılığı kimi, dielsä dä, küzätüçelär fikerençä, berniçä meñ Cömhüriä saqçısı äle dä safta bulırğa tieş. Belgeçlär fikerençä, alar waqıtlıça çitkä posıp torğan, häm kiläçäktä cayı çıqsa baş kütärergä, partizan suğışı başlarğa mömkin.

Ali Gilmi, Praga
XS
SM
MD
LG