Accessibility links

шимбә, 3 декабрь 2016, Казан вакыты 09:50

Amerikan xärbi köçläre Bağdadnı üz kontrolenä aldı


Mäğlümat agentlıqları bügen 20gä yaqın amerikan tankları häm xärbi maşinaları başqalanıñ üzägendäge Azatlıq xäykäle yanına Tahrir Mäydanına kilep bastı, dip xäbär itte. Reuters xäbärçese Hassan Hafidh, amerikan xärbiläre Ğiraq uramnarında tapşırğıçlar aşa xalıqnı qarşılıq kürsätmäskä çaqıra, dip äytte. Amerikan generalı Vincent Brooks , Säddäm köçläre inde Bağdadnı kontrol itmi läkin barıber-başqala qurqınıç şähär bulıp qala, dip belderde. Anıñ süzlärenä qarağanda Ğiraqtağı wazğiät borılış çorına kerde, Ğiraq xalqı Säddäm xökümäteneñ köçkä iä bulmağanın kürä başladı. Säddäm ulı Udaynıñ elekke baş fatirı bulğan Olimpia Komitetı binasına ut törtelgän, şähärdä urlaw häm talawlar başlandı. Britaniä xökümäte Ğiraq Bağdadta üz köçen yuğalta bara dip beldersä dä, Quşma Ştatlar xärbi köçläreneñ wäkile kapitan Frank Thorp, Ğiraqta suğış bette dip äytergä irtä äle, dide. Thorp süzlärenä qarağanda Amerikan köçläre Bağdadtan tönyaqqa, Säddämneñ tuğan şähäre Tikritqa taba xäräkät itä. Soñğı 24 säğat eçendä koalitsiä köçläre Tikrit şähären utqa totqan. Xalıqara Qızıl Xac komitetı bügen Bağdadta üz eşçänlegen tuqtatıp toruı turında belderde. Başqalada xaos , urlaw häm talaw wazğiäte xökem sörä. Oyışmanıñ matbuğat wäkile Moin Kassis, agentlıqnıñ xalıqqa yardäm itä almaw uñayınnan ükeneç belderde häm humanitar yardäm xezmätkärläreneñ üz eşlären mömkin bulğaç ta yañartaçağın wağdä itte. Kiçä oyışmanıñ maşinalarına ut açılğan. İke keşe atışlar başlanğaç qaça alğan, läkin ber keşe –illäte belän Kanadalı Vatche Arslaniannı äle dä taba almıylar. Sky News häm BBC televideniäläre Bağdadnıñ üzägendä Säddäm rejimınıñ betüenä şatlanğan Ğiraqlılarnıñ elekke citäkçeläreneñ häykälen cimerülären kürsätte.

XS
SM
MD
LG