Accessibility links

сишәмбе, 6 декабрь 2016, Казан вакыты 04:00

Mintimer Şäymiev Räfqät Altınbayevnı Federatsiä Şurasında başqa kürergä telämi


Çärşämbe könne, Däwlät Şurası binasında Prezidium utırışı buldı. Anda Däwlät Şurasınıñ kön tärtibenä çığarılaçaq mäs’älälär qaraldı. Anıñ kön tärtibenä 52 mäs’älä quyaldı. Prezidium deputatlar xozurına tağın berniçä mäs’äläne çığarırğa täqdim itte. Mäsälän, Tatarstan prokurorı federal qanunnar, ayırım alğanda mäşğüllek turındağı qanunnarnı bozu oçraqların beterüne taläp itä. Şunıñ belän bergä, Prezidium Prezident yullamasında äytelgän qayber täqdimnär turında da deputatlar belän fiker alışırğa teli. Ber Qazan gäziteneñ xäbärenä qarağanda, şuşı Däwlät Şurası utırışında, yäğni comğa könne, Prezident känäfie öçen sawlaw aldı köräşe başlanıp kitärgä tieş. Läkin Däwlät Şurasınıñ kön tärtibenä qarağanda, ber dä alay uylarğa nigez tapmassıñ. Anda mir sudyaların sawlaw, milli-mädäni berläşmälär xaqındağı qanunnar, federal qanunnarğa tözätmälär kertü turında täqdimnär häm başqa küp sanlı mäsälälär qaralırğa tieş bula. «Bäyräm häm istälekle könnär turında»ğı qanun 3nçe uqılışta qaralaçaq. Xäteregezdä bulsa, ul qanunda Ğabdulla Tuqaynıñ tuğan könendä tuğan tel bäyrämen bilgeläw turında süz bara. 26 aprilgä qädär ul qanun köçenä kerer dip kötelä. Ğomum alğanda, Däwlät Şurası kön tärtibendä, kübesençä elekke Tatarstan qanunnarına tözätmälär kertü, Xanti-Mansi, Yakutia, İvanovo töbäge, Krasnoyarskiy yağı, Komi respublikası qanun çığaru oyışmalarınıñ qanunı initsiativaların qaraw kebek mäsälälär urın alğan. Tatarstannıñ möstäqil eşe turında söylägändä, eşmäkärlekne üsterü turındağı däwlät programmasın telgä alırğa mömkin. Bu eşlekle qäğäzlär sessiädä qaralaçaq häm Tatarstanda 2001dan alıp 2004 yılğa qädär ğämäldä bulaçaq programmağa qayber üzgäreşlär kerteläçäk. Şulay uq «Tatarstan respublikasında iñ möhim mäsälälärne xalıq belän bergä tikşerü turındağı qanun-proektı» da utırışqa çığarıla.

Şulay itep, kön tärtibendä sawlaw aldı köräşenä işärälär yuq. Ämmä, İntertat.ru agentlığı taratqan xäbärdän, alda äytelgän faraznıñ çınğa aşu mömkinlege zur bulıp kürenä. Däwlät Şurası Prezidiumına Tatarstannıñ Rusiä Federatsiä Şurasındağı wäkile Räfqät Altınbayevnı çaqırtıp alu turındağı Prezident qararı kilgän. İntertat.ru xäbär itkänçä, anıñ urınına Mintimer Şäymiev iqtisadıy mäsällärne bağuçı kiñäşçesen Filzä Xämidullinnı täqdim itärgä uylıy. Comğa köne Prezident Däwlät Şurasınıñ utırışında çığış yasap, şuşı mäsäläne kön tärtibenä quyaçaq dip kötelä. Prezident qararı qanunı bulsın öçen, anı deputatlarnıñ öçtän ike öleşe yaqlarğa tieş. Bu xäbärne Qazanda iñ berençe bulıp taratqan gäzitneñ yazuınça, deputatlar Prezidentnıñ täqdimen hiçşiksez yaqlayaçaq.

XS
SM
MD
LG