Accessibility links

Кайнар хәбәр

Ğiraq suğışı başlanuğa 3 atna tuldı


20-nçe mart, pänçeşämbe irtäsendä AQŞ citäkçelegendäge koalitsiä köçläre prezident Säddam Xösäin başqa yuğarı citäkçelär belän oçraşu ütkärä dip isäplängän urınğa raketa höcüme yasap suğışnı başlap cibärgän ide. Kiçä isä AQŞ köçläre Bağdadnıñ üzägen kontrol’gä aldı. Kiçä AQŞ xärbi maşinası yardämendä Säddamnıñ Bağdad üzägendäge 6 metr bieklektäge sının awdarıp töşerü, häm şunda cıyılğan ğiraqlılarnıñ cirdä yatqan Säddam sını östenä menep biüe könneñ töp simvolik waqıyğası buldı.

Ämma Bağdadnıñ qayber öleşlärendä äle dä Säddamğa tuğrılıqlı köçlär qala birä. Şulay da koalitsiä köçläre xäzer töp iğtibarnı başqaladan 160 çaqrımlap tönyaqta urnaşqan Säddamnıñ tuğan şähäre Tikritqa yünältä. Bağdadta soñğı könnärdäge xärbi çaralar çağıştırmaça ciñel ütsä dä, AQŞ citäkçeläre Tikrit öçen bäreleşlär ciñel bulmasqa, Säddam xakimiäte Tikritnı üzeneñ soñğı nığıtması bularaq saqlarğa mömkin dip isäpli. Kiçä Qatarda Ğiraq suğışın citäkçelek itüçe AQŞ Üzäk xärbi idaräsendä dä şundıy belderü yasaldı. Saqlanu ministrı Donald Rumsfeld ta, Berläşterelgän Xärbi Ştab başlığı General Richard Myers ta şundıy belderü belän çıqtı. AQŞ vitse prezidentı Dick Cheney da bolay dip belderde:

AUDİO: Alda äle qatı bäreleşlär bulırğa mömkin. Ğiraq xakimiäte köçläre ilneñ tönyağındağı Mosul, Kirkuk, Tikrit şähärlären äle dä kontrol’dä tota. Şulay da bu suğışnıñ axırı anıñ tarixtağı iñ üzençälekle xärbi kampaniä buluın añlataçaq.

Körd suğışçıları koalitsiäneñ hawa häm cir öste köçläre yardämendä Mosul häm Kirkuk taba xäräkät itä. Bu şähärlärne yawlaw qayçan başlanaçağı äle mäğlüm tügel. Ämma Kördlär inde Kirkik yanına kilep citte. Kiçä Mosul yanındağı strategik ähämiätkä iä bulğan Maqlub tawı da yawlap alındı. Kördlär Maqlubnı yawlap alu Ğiraq köçläre öçen bik zur yuğaltunı añlata dip belderde.

Kiçä dönya televidenieläre Säddam sınınıñ aydarıp töşerelüen kürsätkännän soñ New Yorkta BMO-dağı Ğiraq ilçese Möxämmät Äd-Duri jurnalistlarğa: “Uyın tämam. İnde tınıçlıq urnaşır dip ömetlänäm”, - dide. Säddamnıñ qaydalığı turındağı sorawğa äd-Duri, minem Säddam belän bäyläneşem yuq dip cawap birde. Äd-Duri Ğiraq belän elemtäse yuqlığın belderdergännän soñ işekne yabıp öyenä kerep kitte. AQŞ saqlanu ministrı Rumsfeld ta Säddamnıñ häm anıñ ike ulınıñ qayda buluı mäğlüm tügel dide. Alarnıñ isänme-yuqmı ikänlege dä bilgesez. Ministr äytüençä küzläw mäğlümätläre Süriäneñ Säddam yaqlı qayber räsmilärne üzenä sıyındıruı turında söyli. Ämma älegä Ğiraqnıñ yuğarı citäkçeläre Süriägä qaçqan dip isäplänelmi.

Naif Aqmal, Praga.
XS
SM
MD
LG